Бүгінде Келес ауданы, Абай ауылы аудан орталығы болып қалыптасуына орай әлеуметтік экономикалық даму қарқыны ұлғайып, халқының саны өсуі байқалуда. Сәйкесінше, ауылдың инфрақұрылым жүйелерін жаңарту, жаңадан қалыптастыру, абаттандыру жұмыстарын жүргізу қажеттілігі туындап отыр. Осыған байланысты, Абай ауылының егжей-тегжейлі жоспарлау мен біріктірілген Бас жоспарына өзгерістер мен толықтырулар енгізілу жұмыстары жүргізіліп жатыр. Бұл туралы Келес ауданының әкімі Жәнібек Ағыбаев Абай ауылының тұрғындарымен кездесуінде атап өтті.
Мемлекет басшысының Жарлығына сәйкес Келес ауданының әкімі ауылдық елді мекендерді аралап, жергілікті тұрғындармен кездесті. Аудан басшысының ІІІ тоқсандағы қорытынды кездесуі Абай ауылында өтіп, тұрғындардың сұрағына жауап берілді. Алдымен өткен кездесуде айтылған мәселелердің шешілуі барысына тоқталып, алдағы жоспарларымен бөлісті.
— Жыл басынан бері сіздермен екі рет есепті кездесу өткізіп, ауылдың тұрғындары тарапынан маңызды 8 мәселе көтерілген. Сол мәселелерді шешу бойыша арнайы іс-шара жоспары істеліп, қазіргі таңда жүйелі жұмыстар жүргізілуде. Бүгінде Абай ауылында орналасқан №1 О.Есімов атындағы жалпы орта мектебін қосымша компьютермен жабдықтау бойынша қаржы қарауға облыстық білім басқармасына ұсыныс берілсе, ауданның этномәдени бірлестіктеріне арналған орталық ғимаратын салуға жер қарастыру мәселесі қоғамдық талқылауда қаралып, тиісті шешім қабылданатын болады. Сонымен қатар аудан орталығындағы Ынтымақ, Қожамберді батыр, Отан, Мәдениет көшелерін сапалы электр қуатымен қамту жұмыстары ағымдағы жылдың қараша айында аяқталады, — деді аудан әкімі өз сөзінде.
Аудан орталығын дамыту бағытында кешенді шаралар атқарылуда. Бұл бағытта жергілікті тұрғындардың ұсынысы ескерілуде. Атап айтқанда Т.Рысқұлов көшесінің өткелін орта жол жөндеуден өткізу бойынша бюджеттен қаржы қарастырып, құрылыс жұмыстары келесі жылы жүргізілмек. Ал, З.Рустемов, Қойлыбаев көшелерін жарықтандыру мақсатында «Оңтүстік Жарық Транзит» ЖШС қарасты бетон бағаналарға жарық қондырғыларын орнату үшін техникалық шарттары алынды. Жоспарлы жұмыстар жыл соңына дейін жүзеге асуы жоспарлануда.
