Мемлекет басшысы Қасым-Жомарт Тоқаев ұлықтау шарасында ауыл тұрғындарының әл-ауқатын жақсартудың маңыздылығына тоқталып, өзінің бірінші Жарлығында ауылдарды дамыту тұжырымдамасын әзірлеуді тапсырған болатын.
Бұл орайда, биыл елімізде халықтың табысын арттыру бағдарламасын орындау мақсатында «Ауыл аманаты» жобасы жүзеге асырыла бастады.
«Алдағы 3 жыл ауылдық аймақтарды барынша дамытуға арналады. Ауылдағы тұрмыстың қаладағы сияқты жайлы болуына күш саламыз. Игерілмей бос жатқан жерлерді мемлекеттің меншігіне қайтару жұмыстарын тың қарқынмен жалғастырамыз. Ауылдық жерлерді дамытудың кешенді тұжырымдамасы қабылданады. Бүкіл елімізде ауыл шаруашылығы кооперативтері құрылады. Жеке қосалқы шаруашылықтардың тең жартысы соның құрамына кіреді. Ауыл шаруашылығы саласында 350 мыңнан астам жаңа жұмыс орындары ашылады. Жалпы, кооперативтерді дамыту үшін бюджеттен 1 триллион теңгеден астам қаражат жұмсалады» деген мемлекет басшысының сөзінен кейін «Ауыл аманаты» пилоттық жобасын жүзеге асыру қолға алынды.
Ауыл шаруашылығы тауарын өндірушілерін жан-жақты қолдау, ауыл тұрғындарын агробизнеске барынша тарту, азық-түлік қауіпсіздігі және азаматтардың өмір сүру сапасын жақсартуға байланысты мәселелерді шешу мақсатындағы бағдарламаға Жетісай ауданынан Қарақай, Ж.Ералиев, Қазыбек би және Мақталы ауылдық округтерінің тұрғындары қатысуда. Бүгінде жалпы аудан бойынша өткізілген 1 млрд 301,3 млн теңгенің 219 құжатынан «Ырыс» МҚҰ арқылы 1 млрд 21,7 млн теңгенің 176 жобасы мақұлданған. Оның ішінде 555,4 млн теңгеге жасалған 102 бизнес-жоба қаржыланырылған.
Нақтырақ айтар болсақ, Қарақай ауылдық округі бойынша 402,4 млн теңгеге тапсырылған 281,9 млн теңгенің 71 құжатынан 55 жоба мақұлданып, 198,5 млн теңгеге 41 жобасы қаржыландырылса, Ж.Ералиев ауылдық округінен тапсырылған 62 құжаттың 32-сі 183,9 млн теңгеге қаржыландырылған.
Одан бөлек, Қазыбек би ауылдық округінен 125,8 млн теңгеге 21 жоба, ал, Мақталы ауылдық округі бойынша 8 жоба 47,3 млн теңгеге қаржыландырылған. 4 ауылдық округ бойынша қаражат алған 102 жобаның 9-ы өсімдік шаруашылығын, 83-і мал шаруашылығын таңдаса, 10 жоба тұрлі қызметтерді көрсетуге арналған.
«Ауыл шаруашылығы – ел экономикасының жаңа драйверіне айналады. Ол үшін біздің мемлекетте, ауданда барлық потенциал бар.
Ауыл тұрғындарының табысын арттырып, азық-түлік қауіпсіздігін қамтамасыз ету мақсатындағы жобалардың сәтті жүзеге асырылуы үшін жүзеге асырылып жатқан «Ауыл аманаты» пилоттық жобасына қатысушы тұрғындардың 152,4 млн теңгеге 24 жобасы кепіл шартына тұрып жатса, 43,4 млн теңге болатын 8 жобаның кепіл шарты халыққа қызмет көрсету орталығында тіркелу үстінде» дейді Жетісай ауданы әкімінің орынбасары Марат Айнабеков.
