Бүгін Кентау қаласында Түркістан облысы қоғамдық даму басқармасы «Қоғамдық келісім» КММ-нің ұйымдастыруымен көшпелі жиын өтті.
Жиынға Кентау қаласымен қатар, Сауран, Отырар аудандарының тұрғындары жиналып, мемлекеттік бағдарламалар бойынша қолдаулардың тиімділігі туралы, сондай-ақ өздерін толғандырған мәселелер төңірегінде сауалдарын қойып, өз ойларын ортаға салды.
Келелі жиынға Түркістан облысы қоғамдық даму басқармасы «Қоғамдық келісім» КММ-нің басшысы Эльмира Жанғазиева, Кентау қаласы әкімінің орынбасары Айнұр Байболова, Түркістан облысының жұмыспен қамтуды үйлестіру әлеуметтік бағдарламалар басқармасының «Еңбек мобильділігі орталығы»коммуналдық мемлекеттік мекемесінің бөлім басшысы Райхан Егембердиева, Түркістан облысы Полиция департаменті Жергілікті полиция қызметі басқармасының бастығы, полиция полковнигі Асылхан Төреханов, Кентау қаласының қорғаныс істері жөніндегі бөлімі бастығының орынбасары – жұмылдыру бөлімшесі бастығы, майор Хажиакбар Алиакбаров, сондай-ақ жауапты сала өкілдері қатысты.
Тұрғындар полиция қызметкерлеріне, әскери комиссариатқа сұрақтарын қойды. Халықты жұмыспен қамту, қайтарымсыз грант бөлу, жастарға арналған 2,5 пайыздық жеңілдетілген несие беру, «Жастар практикасымен» жұмыс істеушілерге 103 мың жалақы төлеу, зейнет жасына жақындаған азаматтарды «Күміс жас» жобасымен жұмысқа орналастыру, кәсіпкерлікті дамыту бойынша мемлекеттік бағдарламалардың тиімділігі бойынша түсіндірме жасалды.
Кездесуде сөз алған Түркістан облысы ҚХА жанындағы ақсақалдар кеңесінің төрағасы Созақбай Әбдіқұловтың Президент Жолдауында айтылған мәселелер мен «Ауыл аманаты», «Жастар практикасы» сияқты мемлекеттік бағдарламаларды жан-жақты түсіндіруді күшейтудің қажеттігін айтты. Аталған бағдарламалар бойынша сауалдарға тиісті жауаптар берілді.
Көшпелі жиынды қорытындылаған Түркістан облысы қоғамдық даму басқармасы «Қоғамдық келісім» КММ басшысы Эльмира Жанғазиева Президент тапсырмасымен қолға алынған мемлекеттік бағдарламаларды ауыл-аймақты аралай жүріп, халыққа түсіндірме жұмысын ширатудың маңыздылығын айтып, осы жолда бірлесе жұмыс істеуге шақырды.
