Келес ауданының әкімі Жәнібек Ағыбаев аудан орталығының тұрғыны, тыл ардагері Әбдез Құмановтың шаңырағында болып, Қарттар күнімен құттықтады. Аудан басшысы ардагерге ыстық ықыласын білдіріп, үстіне шапан кигізді. Естелік сыйлығын табыстап, ақ батасын алды.
Әбдез Құлманов 1933 жылы Келес ауданында дүниеге келген. 1957 жылы қазіргі Омар Есімов мектебін алтын медальмен аяқтаған. 1957-1961 жылдар аралығында Райстатта статист болып жұмыс істесе, 1961-1965 жылдары Келес аудандық сотында хатшылық қызметті абыроймен атқарды. 1965-1997 жылдары арасында Келес аудандық жұмыспен қамту және әлеуметтік бағдарламалар бөлімінде аға инспектор болып 32 жыл қазмет атқарып, зейнетке шыққан.
Бүгінде өнегелі әулеттің шамшырағы болған тыл ардагері өткен ғұмырының зейнетіне бөленіп, 5 бала 4 қыз тәрбиелеп 32 немере және 14 шөбере сүйіп ұрпағының алдында бақытты ғұмыр кешіп келеді.
