Келес ауданында орналасқан «Қазыналы қария – тең қоғам» әлеуметтік қызметтер көрсету орталығына Түркістан облысына қарасты аудандардан арнайы делегация келіп, тәжірибе алмасу семинары өтті. Оған облыстағы барлық аудан, қалалардың әлеуметтік қызмет көрсету орталығының мамандары қатысты. Мақсат – өзара тәжірибе алмасу, Келестегі орталық жұмысымен кеңінен танысу болып табылады. Семинарға жиналған өзге аудан мен қалалардағы әлеуметтік қызмет орталығының мамандары ең алдымен орталықтың жұмысымен кеңінен танысты.
— Өткен жылы ауданда ашылған «Қазыналы қария — тең қоғам» орталығынан бүгінгі таңда 500 ге тарта азамат қызмет алады. Келушілерге білікті де білімді мамандары 14 түрлі қызмет көрсетеді.. Егде жасқа келген тұрғындар әр күні осы орталықта отырып қолөнер бұйымдарын да жасайды, тігін тігеді, ән салады. Онан бөлек, салауатты өмір салтын сақтау жолында спортпен де шұғылданады. Қариялар үшін барлық мүмкіндіктер қарастырылған. Олар мұнда теннис, бильярд, шахмат, шашка, нарды, тоғызқұмалақ ойнап қана қоймай, әжелеріміз гимнастикамен де шұғылданады. Мұнда миды тынықтырыатын тұз кеніші де бар, — деді орталық директоры Әйгерім Төлепбергенова.
Орталықтың келушілерге көрсетіп отырған қызметіне таңқалған семинарға қатысушылар өз алғыстарын білдіріп өтті.
