Еңбек қауіпсіздігі және еңбекті қорғау — кез келген кәсіпорын үшін басты міндет.
«Түркістан облысы кәсіподақтар орталығы» аумақтық кәсіподақтар бірлестігі төрағасының орынбасары Айдар Бахтыбаев пен «ШАПАҒАТ-ПЕДАГОГ» білім қызметкерлерінің жергілікті кәсіподағы» қоғамдық бірлестігінің төрағасы Гульнара Тлеубердиева, Дүниежүзілік еңбекті қорғау күніне орай кезекті семинарды Сайрам ауданының адами әлеуетті дамыту бөлімінің №96 жалпы орта мектебінде кәсіподақ мүшелерімен өткізді.
Семинардың мақсаты: еңбек заңнамасы, әлеуметтік диалог, еңбекті қорғау және қауіпсіздік мәселелері бойынша тәжірибе алмасу.
Семинар барысында өз кезегінде сөз алған кәсіподақтар бірлестігі төрағасының орынбасары Айдар Бахтыбаев еңбекті қорғау және еңбек мәдениетін көтеруде кәсіподақтар жұмысының әлеуметтік әріптестермен біріге жұмыс жасауы маңыздылығына тоқталып, Кәсіподақтар федерациясы тарапынан лайықты еңбек жағдайларын жасау, ұжымдық және еңбек шарттарын сақтау, еңбекті қорғау және техника қауіпсіздігін сақтау, жазатайым оқиғалардың алдын алу бағытында атқарылып жатқан жұмыстар жөнінде айтып өтті.
Бұдан бөлек, қатысушылар назарына жұмысшылардың еңбек мүдделері мен құқықтарын қорғау мақсатында Түркістан облысы кәсіподақтар орталығы» жанынан құрылған «Татуластыру орталығы» және «Заң клиникасы»-ның жұмысына тоқталып, қандай да бір мәселе төңірегінде заңгерлердің көмегіне жүгініп, тегін құқықтық кеңес алуға болатынын жеткізді.
Семинар соңында ұстаздар тарапынан қойылған сауалдарға тиісті жауаптар берілді.
Айта кетейік, бүгінде ұжымда 189 еңбеккер жұмыс істейді. Барлығы 100% кәсіподақ мүшелері. Бастауыш кәсіподақ ұйымының төрағасы Равшанбек Ирисдавлатов.
