Түркістан облысы Созақ ауданы, Шолаққорған ауылының тұрғыны Гүлзат Шайхұстанова облыстық мәслихат депутаты Мағауия Тұрысбековтің демеушілігімен салынған жаңа баспанаға қол жеткізді, деп хабарлайды Түркістан облысының Өңірлік коммуникациялар қызметіне сілтеме жасаған 4tagan.kz ақпараттық агенттігі.
Бұған дейін өзінің жеке үйі болмаған, қазіргі таңда жолдасымен бірге жалдамалы пәтерді паналап отырған І топтағы мүгедектігі бар баспана иесіне аудан әкімі Мұхит Тұрысбеков тұрғын үй кілтін табыстап, қоныс тойымен құттықтады.
— Облыс әкімі Дархан Амангелдіұлының ауданымызға жасаған сапарында қабылдауында болып, баспана мәселесін шешіп беру жөнінде өтінішіңізді жеткізген болатынсыз. Міне, осы аралықта өтінішіңізді аяқсыз қалдырмай, қолымызда бар мүмкіндікті пайдаландық. Бұдан бөлек, бүгінде басқа да тұрмысы төмен, аз қамтылған отбасыларға азық-түлік, көмір, отынмен қамту және өзге де қажетті көмектер көрсетіліп келеді, — деген аудан басшысы Мұхит Сексенбайұлы әрбір тұрғын тарапынан көтерілген әлеуметтік мәселелердің өзектілігіне тоқталып өтті.
– Біздің жағдайымызды, жеткізген мұң-мұқтажымызды елеп, ескеріп осы игі істі ұйымдастырып отырған облыс әкіміне, аудан басшысына көп рахмет. Қатты қуанып отырмын. Бақытты болыңыздар, – деді қуанышын жасыра алмаған жаңа үйдің иесі Гүлзат Темірханқызы.
Аудан орталығынан берілген жаңа үйге асхана жабдықтары орнатылып, су, жылу сынды коммуналдық қызметтері жүргізілген. Бау-бақша өсіруге арналған жері бар. Жер учаскесі қосалқы шаруашылықты дамытуға мүмкіндік береді. Мүгедектік арбамен үйіне кіріп-шығуға қолайлы болуы үшін пандус қойылып, бар мүмкіндік жасалған.
