Мемлекет басшысы «Әділетті мемлекет. Біртұтас ұлт. Берекелі қоғам» атты Қазақстан халқына Жолдауында – келер жылы 100 мың жасты жұмысқа орналастыру. Қазіргі жұмыссыз жүрген жастарды кәсіппен баулып, жұмыспен қамту – ұлттың болашағына жасалып жатқан үлкен қадам.
Мемлекет басшысының тапсырмасы бойынша жастарға жеңілдікпен микронесиелер беруді бастау жоспарланып отыр. Осы мақсаттарға 2023 жылға 29 млрд теңге қарастырылған. Бұл қаржы есебінен 5,8 мың жас адамды жеңілдікті несиемен қамту көзделген. Бұл туралы Орталық коммуникациялар қызметінде өткен брифингте еңбек және халықты әлеуметтік қорғау вице-министрі Олжас Ордабаев мәлімдеді.
«Жастарға микронесиелер беру жаңа құрал болып табылады. Несиелер 21-35 жас аралығындағы адамдарға беріледі, бұл ретте пайыздық мөлшерлеме – 2,5%. Несиелеу мерзімі – 5 жылға дейін. Ал мал шаруашылығы үшін 7 жылға дейін. Сонымен қатар негізгі қарыз бен сыйақы өтеу бойынша жеңілдікті кезең беріледі. Оның ұзақтығы микрокредит беру мерзімі ұзақтығының 1/3 аспайды. Несие беруді Аграрлық несие корпорациясы жүзеге асырады. Бұл ұйымның несиелеу бойынша тәжірибесі зор және өңірлерде филиалдары бар», — деді спикер.
Бұдан бөлек, грант беру құралдары жасалды. 2023 жылы 9 мың адам грантпен қамтылады. Гранттар халықтың әлеуметтік осал топтарына беріледі. Олардың мөлшері 400 АЕК немесе 1,3 млн теңгені құрайды. Гранттарды беру лектер бойынша жүзеге асырылады. Осы аптада бірінші лек бойынша құжаттар қабылдау басталды. Мұнда 2,6 мыңнан астам грант беру жоспарлануда. Биыл барлығы кемінде 4 лек өтеді. Құжаттар онлайн режимде қабылданады.
Айта кетейік,
21-35 жас аралығындағы азаматтар «Аграрлық кредиттік корпорациясы» арқылы 2,5 пайыздық несие алу үшін міндетті түрде кепіл қою керек. Бұл жайында орталық коммуникациялар қызметінде өткен брифингіде айтылды.
БАҚ өкілдерінің сауалына жауап берген Еңбек және халықты әлеуметтік қорғау министрлігінің мамандары аталған несие алу үшін міндетті түрде кепілге мүлік қою керектігін түсіндірді.
Олардың айтуынша, кепілдік ретінде жылжымайтын мүлік пен арнайы техника қойылады.
«Жастарға микрокредит беру жаңа құрал болмақ. Кредиттер 21-ден 35 жасқа дейінгі аралықтағы жастарға беріледі. Бұл ретте пайызды мөлшерлеме 2,5 пайыз болады. Мерзімі – 5 жылға дейін. Ал мал шаруашылығы бағытында алса, 7 жылға дейін. Сонымен қатар негізгі қарыз бен сыйақыны өтеу бойынша жеңілдікті кезең беріледі. Оның ұзақтығы микрокедит мерзімінің үштен бірінен аспауы керек. Бұл кредиттерді «Аграрлық кредиттік корпорация» АҚ береді», — деді вице-министр Олжас Ордабаев.
