Сарыағаш ауданы Қызылжар ауылдық округінде орналасқан №75 Ж.Жабаев атындағы 620 орындық жалпы орта мектепке биыл маусым айында күрделі жөндеу жұмыстары басталып, осы жылы тамыз айында оқу ордасы пайдалануға берілді.
Онда мердігер мекеме «Сервис Центр-2007» ЖШС-і ғимараттың шатыры мен едендері ауыстыру, сыртқы және ішкі қабырғаларын әрлеу, есіктерін ауыстыру және ішкі электр желілері мен спорт залын жаңарту жұмыстарын жүргізген.
Қазіргі таңда мектептің оқушылары заман талабына сай қайта жасақталған ғимаратта білім алып жатыр. Толық жөндеуден өткен білім ордасын аудан әкімі М.Отаршиев арнайы барып, мектептің тыныс-тіршілігімен танысты.
«Биыл – балалар жылы. Еліміздің мығым болуы – болашақ ұрпақтың қолында. Оқушы жастардың осыны жете түсініп, артылған сенімді ақтап, жақсы оқып, үлгілі азамат, білікті маман болып шығуларына тілектеспін», – деді аудан басшысы.
Жаңа ғимаратта білім нәрімен сусындаған шәкірттердің де қуанышында шек жоқ. Күрделі жөндеуден өткен мектеп болашақта оқушылардың сапалы білім алуына сеп болмақ.
