Арыс қаласының әкімі Гүлжан Құрманбекованың Монтайтас ауылына қарасты Шағыр елді мекенінде өткен кездесуде ауыл тұрғындары үй мен қора жайын құжаттандыру үшін Арыс пен ауыл арасында көп сабылып, шығынданатынын айтып шағымданған болатын.
Гүлжан Мамытқызы бұл мәселені шешудің тиімді әрі төте жолын айтты.
«Біз жыл басынан бері әкімдіктің салалық құрылымдарындағы жауапты мамандардан арнайы жұмысшы топ құрып, әрбір ауылды аралап, кездесу ұйымдастырып келеміз. Бұл жұмыс оң нәтижесін беруде», – деген қала әкімі ендігі жерде осы жұмысшы топ өкілдерін ауылдық округтерге ғана емес, шағын болса да шалғайда отырған елді мекендерге жіберу керектігін атап өтті.
«Ал бұл тапсырманы орындауды Монтайтас ауылының әкіміне елдің көзінше жүктеймін. Жұрт құжатын реттеу үшін қалаға қарай сабылып жүрмеуі тиіс. Керісінше, мамандар ел аралап, қалың елдің арасында жүрсін. Тұрғындар цифрлық қолтаңбамен қол қоятын кезде ғана Арыстағы Халыққа қызмет көрсету орталығына баруы тиіс. Ал жергілікті әкімдік азаматтардың қалаға барып-қайтуын қоғамдық көлікпен қамтамасыз етуі тиіс», – деді қала әкімі.
Еске салайық, Мемлекет басшысы Қасым-Жомарт Тоқаевтың арнайы Жарлығына орай, осы күндері қала әкімі Гүлжан Құрманбекованың Арыс қаласы мен ауылдық округ тұрғындарымен кездесуі өтуде. Алдын ала бекітілген кесте бойынша мұндай шаралар апта соңына дейін жалғасады деп жоспарланған.
