Жуырда мемлекет басшысы Қасым-Жомарт Тоқаевтың Қазақстан халқына арнаған «Жаңа Қазақстан: жаңару мен жаңғыру жолы» Жолдауы негізінде Түркістан облысынан Қарағанды облысына бүкіл Қазақ елі қадір тұтатын қастерлі өлке — Ұлытау жайлы тарихи-танымдық фильм түсіру мақсатында «Мәртөбеден Ұлытауға» экспедициясы ұйымдастырылған болатын.
Міне, сол экспедициясының жалғасы ретінде 31-наурыз күні ұлт ұясы – Ұлытаудан жаяу шыққан жиһанкез бүгін қазақ рухының қағбасы – Ордабасы ауданына табан тіреді.
Әуелі күш атасы — Қажымұқан Мұңайтпасұлы атындағы облыстық спорт мұражайына бас сұққан қарт жиһанкез балуан атамыздың өмір деректерімен танысып, даңықты балуан мәңгілік мекен еткен Темірландағы мазаратқа барып, зиярат етті.
Онан соң үш жүздің басы қосылған тарихи мекен — Ордабасы тауына қарай жол алды.
Бүгінге дейін 1000 шақырымды артқа тастаған ақсақалдың миссиясы – Қазақстанды жаяу аралап, Ұлытау ордасының шежірелі тарихынан сыр шерту.
72 жастағы Сәрсенбай Оспанұлының сөзіне сүйенсек, бұл сапарында қазақ халқының ұмыт болып бара жатқан қолданбалы өнер түрлерін жинақтап, ЮНЕСКО-ға өткізуді көздеп отыр.
Ордабасы ауданы әкімдігінің баспасөз қызметі
