КСРО Халық артисі, Халық қаһарманы, мемлекеттік сыйлықтың иегері, композитор, күйші, дирижер Нұрғиса Атабайұлы Тілендиевтің туған күніне орай, 1 сәуірде, сағат 19:00-де Жамбыл атындағы Қазақ мемлекеттік филармониясының Үлкен залында Н.Тілендиев атындағы академиялық фольклорлы-этнографиялық «Отырар сазы» оркестрінің «Атадан мұра» атты концерттік кеші өтеді.
Осыдан 40 жыл бұрын Н.Тілендиевтің жетекшілігімен құрылған фольклорлы-этнографиялық бағыттағы «Отырар сазы» оркестрі өнерсүйер қауымға ғасырлар қойнауынан жеткен баға жетпес мәдени мұрамыз-қазақтың ұлттық музыка аспаптарының аса бай жинағымен танысуға мол мүмкіндік береді.
Оркестр репертуарында көптеген халық күйлері мен әндері, классикалық музыканың үздік үлгілері, Қазақтың және шетелдік көрнекті композиторлардың және Н.Тілендиевтің шоқтығы биік шығармалары қамтылған. Аталған концертте талантты әрі танымал артистер, Қазақстанның еңбек сіңірген қайраткерлері Гүлзат Дәуірбаева, Дина Хамзина, Айгүл Қосанова, Жұбаныш Жексенұлы, Нұржан Жанпейісов өнер көрсетіп, Н.Тілендиевтің таңдаулы туындылары орындалады.
Іс-шараға ҚР Мәдениет және спорт министрлігінің және Алматы қаласы әкімдігінің өкілдері, қоғам қайраткерлері, Н.Тілендиевтің туыстары қатысады. Сонымен қатар, Үлкен залдың фойесінде Н.Тілендиев атындағы мемориалды музейінің экспонаттар көрмесі қойылады.
Оркестрдің көркемдік жетекшісі және бас дирижеры Қазақстанның еңбек сіңірген қайраткері Дінзухра Тілендиева. Дирижерлар: Қазақстанның еңбек сіңірген артисі Жалғасбек Бегендіков, Қазақстанның еңбек сіңірген қайраткері Мүсілім Әмзе.
БАҚ өкілдерінің тіркелуі міндетті.
Байланыс телефондары: +77028098007 Манар; +77014200707 Данияр
E-mail: philarmonic@mail.ru
