Түркістан облысында кәсіпкерлікті дамыту бағытындағы жұмыстар қарқынды жүріп жатыр. Саладағы өзекті мәселелер мен алдағы міндеттер облыс әкімі Нұралхан Көшеровтің төрағалығымен өткен аппараттық мәжілісте талқыланды.
Өңірде бүгінде 200 мыңнан астам шағын және орта бизнес субъектісі жұмыс істейді. Бұл көрсеткіш бойынша Түркістан облысы Алматы және Астана қалаларынан кейін республикада үшінші орында тұр. Сонымен қатар сауда саласындағы нақты көлем индексі 119,7 пайызға жетіп, өңір еліміз бойынша үздік үштікке енді.
Облыста кәсіпкерлік жобаларды сүйемелдеу, қаржылай қолдау және өндірістік алаңдар арқылы жаңа өндірістер ашу бағытында жүйелі жұмыстар жүргізіліп келеді. Қазіргі таңда «Түркістан» кәсіпкерлерге қызмет көрсету мекемесі арқылы жалпы құны 58,5 млрд теңгені құрайтын 377 бизнес-жоба сүйемелденіп жатыр. Аталған жобалар толық іске асқанда 3082 жаңа жұмыс орны ашылады.
Жыл басынан бері осы жобалардың 78-і іске қосылып, экономикаға 9,5 млрд теңге инвестиция тартылды. Нәтижесінде 275 адам тұрақты жұмыспен қамтылды. Іске қосылған жобалардың қатарында сабын және пластик ыдыс өндірісі, балық өңдеу, ауыл шаруашылығы техникасының қосалқы бөлшектерін шығару, жиһаз өндірісі, мақта өңдеу, құрылыс материалдарын өндіру және медицина саласындағы жобалар бар.
Кәсіпкерлерді қолдаудың маңызды тетігі саналатын қаржыландыру бағытында да нәтижелі жұмыстар атқарылуда. Биыл «Өрлеу» және «Іскер аймақ» бағдарламалары арқылы кәсіпкерлерге 85 млрд теңге көлемінде несие беру жоспарланған. Бүгінгі күнге дейін «Өрлеу» бағдарламасы аясында 64 жобаға 18,6 млрд теңге қаржы берілді. Ал «Іскер аймақ» бағдарламасы арқылы 6 жобаға 448,5 млн теңге көлемінде несие рәсімделді.
Сонымен қатар «Ауыл аманаты» бағдарламасы шеңберінде 140 жобаға сүйемелдеу жүргізіліп, бүгінгі күнге дейін 69 жобаға 606,4 млн теңге қаржы қарастырылған. Бағдарлама аясында қымыз өндіру, аяқ киім тігу, балық өңдеу, табиғи шырын шығару, ет және мақта өнімдерін өңдеу бағытындағы жобалар іске қосылды.
Өңірде өндірістік инфрақұрылымды дамытуға ерекше көңіл бөлінуде. Бүгінде облыс аумағында 29 шағын өндірістік алаң құрылған. Бұл аумақтарда 275 өндірістік ғимараттың құрылысы басталып, оның 141-і пайдалануға берілді. Жалпы құны 226,9 млрд теңгені құрайтын 269 жобаның пулы жасақталған. Оның ішінде 78 жоба іске қосылып үлгерді.
Өндірістік парктерде жиһаз өндірісі, құрылыс материалдарын шығару, жеңіл өнеркәсіп, химия және тамақ өнеркәсібі бағытындағы жобалар жүзеге асырылуда. Жыл соңына дейін ақылды есептегіш құралдар, күн панельдерінің бөлшектері, пластикалық құбырлар, тұрмыстық химия өнімдері және құрылыс материалдарын өндіретін бірқатар ірі жобалар іске қосылады.
Мәжілісте облыс әкімі Нұралхан Көшеров кәсіпкерлікті қолдау жұмыстарын күшейтіп, өндірістік жобаларды уақтылы іске асыруды, инвестиция тарту қарқынын арттыруды және жергілікті өнім өндірушілердің үлесін көбейтуді тапсырды. Бұл бағыттағы жұмыстар қатаң бақылауға алынған.
