Түркістан облысының әкімі Нұралхан Көшеровтің тапсырмасына сәйкес, биыл Жетісай ауданында бірқатар ветеринариялық нысандардың құрылысы жүргізілуде. Қазіргі таңда қажетті жер телімдерінің құжаттарын рәсімдеу жұмыстары толық аяқталған. Аудан әкімі Серік Мамытов аудандағы ветеринариялық нысандардың құрылыс барысын бақылады. Өңір басшысы салаға жауапты мамандар мен мердігер мекеме өкілдеріне құрылыс сапасына айрықша мән беру қажеттігін атап өтті.
Республикалық бюджеттен бөлінген қаржы есебінен шілде айының соңына дейін 1 ветеринарлық станция мен 9 ветеринарлық пункттің құрылысы жүргізіледі. Сонымен қатар, ұсақ малдарды шомылдыруға арналған 9 арнайы бассейн және 2 мал өлекселерін тастайтын орын салу көзделіп отыр.
Ветеринариялық инфрақұрылымды дамыту мал шаруашылығы саласының тұрақты дамуына және жануарлар арасында түрлі аурулардың алдын алуға мүмкіндік береді. Жаңа нысандардың іске қосылуы ветеринариялық қызметтердің қолжетімділігін арттырып, тұрғындарға сапалы қызмет көрсетуге жағдай жасайды.
Аталған жобалар өңірдегі эпизоотиялық ахуалды жақсартуға, мал басының қауіпсіздігін қамтамасыз етуге және ауыл шаруашылығы өнімдерінің сапасын арттыруға бағытталған. Сонымен қатар, ветеринариялық нысандардың заманауи талаптарға сай салынуы сала мамандарының жұмыс тиімділігін көтеріп, ауданның аграрлық әлеуетін нығайтуға ықпал етеді.
