Ордабасы ауданының аграрлық дамуының маңызды аспектісі – суармалы жерлерді тиімді пайдалану және жаңғырту арқылы егін өнімділігін арттыру. Аудан экономикасының негізгі қозғаушы күші – ауыл шаруашылығы болғандықтан, егістік жерлерді суару мәселесі стратегиялық мәнге ие.
Аудандағы жалпы егістік жер көлемі – 88,1 мың гектар, оның ішінде суармалы жер – 34,4 мың гектар. Суармалы жерлерді тиімді пайдалану мол өнім алудың негізгі факторы болып табылады. Сол себептен 2025 жылы аудан бойынша 9 каналға күрделі жөндеу жұмыстары жүргізіліп, жалпы жобаның құны 9,5 млрд теңгені құрады. Бұл каналдар арқылы егістік жерлер толық суаруға мүмкіндік алады. Мәселен, Төрткөл ауыл округінен “Р-11-С”, “Р-11-К”, “Р-12” каналдары, Бөген ауыл округінен “ЛБК”, “Р-1” каналдары жөндеуден өткізілуде. Сонымен қатар, Қажымұхан, Жеңіс және Қараспан ауыл округтерінде де каналдардың күрделі жөндеуі жүргізілуде.
Каналдарды жөндеу және суару жүйелерін жаңарту жұмыстарының нәтижесінде егістік жерлерде өнім көлемі артты. Ағымдағы жылы көктемгі дала жұмыстары мен күзгі жиын-терім науқанында 370 агроқұрылым төрағаларына 6,2 мың тонна жеңілдетілген жанармай бөлінді. Бұл шара егіс жұмыстарының тиімділігін арттыруға септігін тигізді.
Сондай-ақ, су үнемдеу технологияларын енгізу де маңызды орын алады. 2030 жылға дейін ауданда 15 891 гектар жерге су үнемдеу жүйелерін енгізу жоспарланған. Қазіргі таңда – 6 925 гектар жерге енгізілген, оның ішінде 1 395 гектары тамшылатып суғару, 200 гектары жабырлатып суғару арқылы жүзеге асырылған. Мысалы, Жеңіс ауыл округінен «ПК Дала» АӨК 650 гектар жерге тамшылатып суғару тәсілімен мақта дақылын егуде, гектарына 45 центнер өнім алды. Бұл әдіс тек суды үнемдеп қана қоймай, мол және сапалы өнім алуға кепілдік береді.
Аудан әкімдігі суармалы жерлерді дамытуда тек техникалық жаңғыртуды ғана емес, шаруалардың заманауи технологияларды пайдалануына қолдау көрсетуді де назарға алды. Жаңа техника сатып алу субсидиялары арқылы 168 бірлік техника алынды, бұл өткен жылмен салыстырғанда едәуір артты. Жаңартылған техника егістік жерлерді өңдеу, тыңайтқыштарды тарату және суару жұмыстарын жылдам әрі тиімді жүргізуге мүмкіндік берді.
Қорытындылай келе, Ордабасы ауданының суармалы жерлерді дамыту тәжірибесі ауыл шаруашылығында мол өнім алуға, жер ресурстарын тиімді пайдалануға және ауыл шаруашылығы өндірісін заманауи стандарттарға сәйкестендіруге бағытталған. Бұл шаралар аудан экономикасының тұрақтылығын қамтамасыз етіп, тұрғындардың әлеуметтік әл-ауқатын арттыруға тікелей әсер етеді.
