Ордабасы ауданы ауыл шаруашылығының негізгі қозғаушы күші болып табылады. Аудан экономикасы негізінен аграрлық салаға негізделгендіктен, егін шаруашылығын дамыту – ауыл тұрғындарының табысын арттыру мен өңірдің экономикалық дамуы үшін маңызды бағыт болып саналады. 2025 жылы Ордабасы ауданында егін шаруашылығы саласында ауқымды жұмыстар жүргізілді.
Ағымдағы жылы ауданның ауыл шаруашылығы дақылдары үшін 71,2 мың гектар жерге егін егілді. Оның ішінде масақты дақылдар – 30,1 мың га, дәнді жүгері – 7,0 мың га, көкөніс – 3,5 мың га, картоп – 357 га, майлы дақылдар – 5,4 мың га, мақта – 7,2 мың га, бақша – 1,5 мың га, мал азықтық дақылдар – 16,1 мың га көлемінде орналастырылды.
Аталған дақылдардың өнімін жинау барысында жалпы 391,8 мың тонна өнім алынды. Масақты дақылдардан 41,3 мың тонна, жүгеріден 76,7 мың тонна, көкөністен 91,1 мың тонна, картоптан 7,4 мың тонна, майлы дақылдардан 4,5 мың тонна, бақшадан 35,3 мың тонна, мақтадан 22,5 мың тонна, мал азықтық дақылдардан 112,7 мың тонна өнім өндірілді. Бұл көрсеткіштер өткен жылмен салыстырғанда елеулі өсімді білдіреді.
Егін шаруашылығында суармалы жерлерді тиімді пайдалану – мол өнімнің басты кепілі. Аудан көлемінде каналдарға күрделі жөндеу жұмыстары жүргізіліп, механикалық тазалау жұмыстары қолға алынды. Көктемгі және күзгі науқан кезінде 51 каналдың 132 шақырымы тазаланып, суаруға дайындалды. Сонымен қатар, су үнемдеу технологиялары енгізіліп, қазіргі таңда 6 925 гектар жерге заманауи су үнемдеу жүйелері орнатылды. Оның ішінде 1 395 гектарға тамшылатып, 200 гектарға жабырлатып суғару жүргізілді.
Заманауи технологияларды енгізу арқылы егін шаруашылығы тек көлемді емес, сапалы өнім алуға мүмкіндік беріп отыр. Мысалы, Жеңіс ауыл округіндегі «ПК Дала» АӨК 650 гектар жерге мақта дақылын тамшылатып суғару тәсілімен егіп, гектарына 45 центнер өнім алды. Бұл көрсеткіш су үнемдеу мен өнімділіктің тікелей байланысын айқын көрсетеді.
Егін шаруашылығын дамытуда тыңайтқыштар мен органикалық азықтарды тиімді пайдалану да маңызды. Ағымдағы жылы шаруалар егістік жерлерді баптау үшін 14,9 мың тонна минералды және органикалық тыңайтқыш қолданды. Бұл дақылдардың сапасын арттырып, өнімділікті жоғары деңгейге жеткізеді.
Қорытындылай келе, Ордабасы ауданының егін шаруашылығын дамыту бағытындағы шаралары ауыл шаруашылығының тиімділігін арттыруға, өнім көлемін көбейтуге және тұрғындардың әл-ауқатын жақсартуға бағытталған. Заманауи технологияларды қолдану мен суармалы жерлерді тиімді пайдалану арқылы ауданның аграрлық секторы тұрақты дамып, экономикалық өсімге қол жеткізуде.
