Аймақтың геологиялық құрылымы құрылыс материалдарына бай болғандықтан, жер қойнауын пайдалану мәселесі маңызды бағыттың бірі болып қала береді. Құм, қиыршық тас, саз, түрлі кен орындарын игеру — құрылыс индустриясы үшін негізгі ресурс. Бірақ ресурсты заңсыз пайдалану экологияға зиян тигізіп қана қоймай, мемлекетке үлкен шығын әкелетіні белгілі.
Соңғы он айда арнайы жұмыс тобы 28 рейд өткізді. Оның нәтижесінде 30 заң бұзушылық анықталып, 2,2 млн теңгеден астам айыппұл салынды. Бұл — бақылау жұмысының біршама күшейгенін көрсететін маңызды көрсеткіш.
Бұрын заңсыз карьерлер көп болған. Әсіресе түнгі уақытта рұқсатсыз топырақ тиеу, өзен жағасын заңсыз қазу фактілері жиі тіркелетін. Қазір рейдтік бақылау жиі жүргізіліп, мұндай әрекеттер айтарлықтай азайды.
Жер қойнауын пайдалану тек экономикалық емес, экологиялық жауапкершілікті де талап етеді. Судың ағымын өзгерту, топырақ эрозиясына әкелу, өсімдіктерге зиян келтіру — заңсыз қазбалардың ұзақ мерзімді зардаптары. Сондықтан бақылау қатаң болуы тиіс.
Жер қойнауын заңды игеріп отырған 24 компания бар. Олар лицензиясы бар, экологиялық талаптарды орындап, салық төлеп, жұмыс орындарын ұсынып отыр. Кейбірі өңірдің инфрақұрылымына да үлес қосуда.
Заңды жұмыс істейтін кәсіпкерлердің айтуынша, ең үлкен мәселе — заңсыз қазба жасайтындар. Олар бағаны түсіріп, нарықты бұзады. Сондықтан ресми компаниялар да бақылаудың күшеюін құптайды.
Жер қойнауы — ұрпаққа қалатын байлық. Оны заңды әрі ұқыпты игеру — өңір дамуының маңызды бөлігінің бірі.
