Соңғы жылдары Түркістан облысындағы ең серпінді дамып келе жатқан өңірлердің бірі – Ордабасы аймағы. Бұл өңірдің инвестициялық тартымдылығының артуына басты себеп – индустриялық аймақтың қарқынды дамуы мен жаңа кәсіпорындардың тұрақты түрде іске қосылуы. Өндіріс ошақтары көбейген сайын жұмыс орындары да артып, жергілікті тұрғындардың әл-ауқаты жақсарып келеді.
Индустриялық аймақтың негізгі ерекшелігі – инфрақұрылымның толық қамтылуы. 102,5 гектар аумаққа су, газ, электр желілері тартылған, жолы жасалған, кәсіп ашамын дегендерге барлық жағдай қарастырылған. Бос жер телімі қалмағаны — инвесторлардың аймаққа деген ынтасының айқын белгісі. Индустриялық аймаққа келіп жатқан әрбір компания өндірісті саннан сапаға өткізуге, жаңа технологияларды енгізуге мүдделі.
Бүгінде мұнда құны 22,6 млрд теңгені құрайтын 8 ірі жоба жұмыс істеп тұр. Олардың қатарында трактор жинайтын «KazKioti», болат құю зауыты «KarlsKrona», алюминий профильдерін шығаратын «Gold Aluminum», құрылысқа қажетті газоблок өндіретін «RZN» секілді кәсіпорындар бар. Әрбір зауыт өз саласында маңызды рөл атқарып, өңірдің өндірістік картасын кеңейтіп отыр.
Тек жұмыс істеп тұрғандары емес, салынып жатқан жобалар да аймақтағы экономикалық серпінді күшейтіп келеді. Құны 12,3 млрд теңгені құрайтын 7 жоба іске қосылғанда, қосымша 416 жұмыс орны пайда болады. Бұл – жүздеген отбасы үшін тұрақты табыс, кәсіптік дағды қалыптастыру мүмкіндігі және аймақтың әлеуметтік тұрақтылығының артуы.
Индустриялық аймақтың 500 гектарға ұлғаюы — нағыз стратегиялық шешім. Бұл кеңейту жобасы аяқталғаннан кейін өңірге келетін ірі инвесторлар саны айтарлықтай артады деп күтілуде. Жаңа кәсіпорындар тек өнім өндіріп қана қоймай, өңірді жаңа технологиялармен қамтамасыз етіп, экспорттық мүмкіндіктерді күшейтеді.
Инфрақұрылым мәселесі де қатар шешілуде. 50 мегаватттық «Бадам» қосалқы станциясының құрылысы басталды, бұл болашақта электр қуаты тапшылығын мүлде болдырмайды. Өндіріс орындарына энергияның үздіксіз жетуі — олардың тұрақты жұмыс істеуінің басты шарты.
Өңірдің Шымкент агломерациясына жақын орналасуы да кәсіпкерлер үшін ерекше артықшылық. Нарық үлкен, логистика ыңғайлы, көлік дәліздері қолайлы. Осы мүмкіндікті тиімді пайдалану мақсатында Бадам және Темірлан аймақтарында өндірістік парктер салынып жатыр. Көпқабатты өндірістік ғимараттар кәсіпкерлерге жалға беріліп, олар өз бизнесін бастауға немесе кеңейтуге жетеді.
Осының барлығы Ордабасы өңірін алдағы 5–10 жылда Қазақстанның өндірістік хабтарының біріне айналдырады деген сенім бар. Өндіріс саласы дамыған жерде жұмыс орындары да, инвестиция да, бюджет кірісі де артады. Бұл – өңірдің экономикалық тұрақтылығының кепілі.
