Ордабасы ауданы индустриялды аймағы соңғы жылдары шын мәнінде өңірдің өндірістік жүрегіне айналды. 102,5 гектар аумақта орналасқан бұл аймақ инфрақұрылымымен, ыңғайлы логистикасымен және дайын жер телімдерімен кәсіпкерлер үшін аса тиімді ортаны қалыптастырды. Бүгінде бұл жерде жалпы құны 22,6 млрд теңгеге бағаланған сегіз жоба жұмыс істеп, 722 адамды тұрақты жұмыспен қамтып отыр.
Индустриялды аймақтың басты мақсаты – өндіріс саласын дамыту, кәсіпкерлерге қолайлы жағдай жасай отырып, өңірге инвестиция тарту. Осы мақсатта жыл сайын инфрақұрылым жаңартылып, жаңа өндірістік ғимараттар бой көтеруде. Аймақта трактор жинау, болат құю, көкөніс сақтау, алюминий профильдері мен газоблок өндіру сияқты түрлі салалар дамып келеді.
Қазіргі таңда индустриялды аймақта жалпы құны 12,3 млрд теңгені құрайтын жеті жаңа жоба салынып жатыр. Жоба толық іске қосылғанда қосымша 416 жұмыс орны пайда болады. Бұл жобалар арасында құрылыс материалдары, жиһаз өндірісі, ойын алаңшаларын құрастыру және тыңайтқыш шығару бағыттары бар. Әсіресе газбетон өндірісі нарықтағы сұранысты толық өтеуге мүмкіндік береді.
