Шардара ауданының әкімі Арман Қарсыбаев қала аумағындағы бірқатар нысандарды аралап, атқарылып жатқан жұмыстармен танысты. Атап айтқанда, 1,5 гектар аумақта орналасқан «Тұқым бақ» жоспарымен танысып, оның болашақтағы маңыздылығына тоқталды. Облыс әкімінің тапсырмасына сәйкес, ауданда сәнді ағаш көшеттерін өсуру қолға алынбақ. Аудан басшысы тиісті мамандарға бұл істі жүйелі түрде жүргізуді тапсырды. Күз мезгілінде түрлі ағаш тұқымдары егіліп, көктемде тамшылатып суғару әдісі арқылы көшеттерді өсіру жоспарланған.
Сонымен қатар, аудан басшысы №2 ықшам ауданындағы бұрын бей-берекет қоқыс тасталған 2,7 гектар жерді абаттандыру барысымен танысты. Қазіргі таңда аумақта аяқжолдар салынып, жарықшамдар, орындықтар және үгіт тақтайшалары орнатылған. Одан бөлек, демеушілер есебінен жастардың бос уақытын тиімді өткізуге арналған спорттық нысандар орнатылған.
Сондай-ақ, балалар ойын алаңшасы мен кіші футбол алаңының құрылыс жұмыстары жүргізілуде. Тұрғындарға жайлы орта құру мақсатында қолға алынған жоба жуық арада аяқталып, тұрғындардың игілігіне тапсырылмақ. Аудан басшысы қос нысанның сапалы әрі уақытылы аяқталуын қатаң бақылауға алып, жауапты мамандарға нақты тапсырмалар жүктеді.
