Түркістан облысы қоғамдық даму басқармасы “Жастар ресурстық орталығы” КММ-нің ұйымдастыруымен Түркістан облысы, Созақ ауданындағы «Жұмбақ тас» этно-лагерінде өтіп жатқан «JasSAQ» республикалық этно-реалити жобасы аясында қазақ күресі сайысы ұлттық рухты көтерген тартысты бәсекеге айналды.
Сайыстың мақсаты – ұлттық спорт түрлерін жастар арасында насихаттау, батырлық пен қайсарлықты дәріптеу, күш-қайрат пен әдіс-тәсіл үйлесімін қалыптастыру.
Жарысқа еліміздің түкпір-түкпірінен келген жас спортшылар қатысып, 6 команда құрамында өзара белдесті. Қазақ халқының дәстүрлі күресі саналатын бұл сайыс қатысушылардың дене дайындығын ғана емес, рухани төзімділігін де сынады.
Сайыс ашық алаңда, арнайы дайындалған күрес кілемінде өтті. Әр белдесу әділқазылардың бақылауымен өткізіліп, спортшылардың шеберлігі, қарсыласқа құрметі және ережені сақтауы қатаң ескерілді.
Белдесу кезінде қатысушылар өздерінің төзімділігі мен тактикалық тәсілдерін көрсетті. Әр команда намысын қорғаған спортшылардың жеңіске деген жігері мен ерік-күші көрермендерге ерекше әсер қалдырды.
Сайыс барысында достық рух пен бір-біріне қолдау танытқан сәттер көп болды. Жастар арасындағы бұл белдесулер ұлттық спорттың тек жарыс қана емес, тәрбиелік мәні зор өнер екенін дәлелдеді.
Белдесу нәтижелері жалпы командалық ұпайға қосылып, басқа сайыстармен бірге бағаланады. Жобаның жабылу рәсімінде үздіктер анықталып, арнайы марапаттар табысталатын болады.
