Түркістан қаласындағы «Достық үйінде» украиналық «UBC» компаниясының серіктестері және инвесторларымен бизнес-форум өтті. Халықаралық форумға Украина, Түркия, Грузия, Қытай, Әзербайжан, Өзбекстан және еліміздің ірі компания иелері мен өкілдері қатысты.
✔️Форумда, алдымен Түркістан облысының инвестициялық-экономикалық әлеуеті туралы презентация жасалды.
✔️Түркістан облысының әкімі Нұралхан Көшеров аймақтың инвестициялық әлеуетіне тоқталып, жиынға қатысушыларды бірлесе жұмыс істеуге шақырды. Тоңазытқыштар өндірісі жобасының сәтті жүзеге асатынына сенім білдірді.
📌– Сіздерді түркі тілдес халықтардың жүрегі саналатын Түркістан қаласында қарсы алғаныма қуаныштымын! Бүгінгі іс-шара – идеялар алмасатын және жеткен жетістіктер туралы ой бөлісетін тамаша алаң. Мемлекет басшысының тікелей тапсырмасымен өңірге инвестиция тарту жұмыстары қарқын алып, кәсіпорындар ашылуда. Түркістан – Ұлы Жібек жолында орналасқан Қазақстанның тарихи-мәдени орталығы. Тарихы терең шаһардың бүкіл түркі халықтары үшін рухани маңызы жоғары. Батыс пен шығыстың арасындағы сауда қатынастары, тиімді географиялық орналасуы және көптеген тарихи нысандары Түркістанды Орталық Азиядағы инвестициялар мен туризмнің орталығына айналдыруға зор мүмкіндіктер береді. 2018 жылы құрылған Түркістан облысы сауда-экономикалық байланыстарды және өзара тиімді ынтымақтастықты дамыту үшін үлкен әлеуетке ие. Қазіргі уақытта өңірдің инвестициялық қоржынында 2025-2028 жылдарға жоспарланған 110 инвестициялық жоба бар. Бұл жобалар 4,6 миллиард АҚШ долларына дейін инвестиция тартуға және 19 мыңнан астам жаңа жұмыс орнын құруға мүмкіндік береді. Сондай-ақ, өңірде «TURAN» арнайы экономикалық аймағы және индустриалды аймақтар сияқты инвестициялық алаңдар бар. Облыс әкімдігі инвесторлардың барлық бастамаларын қолдауға дайын екенін атап өткім келеді, – деді Нұралхан Көшеров.
✔️Маңызды басқосуда «Түркістан Инвест» компаниясының басқарма төрағасы Өмірзақ Юсупов Түркістан облысының инвестициялық әлеуетін таныстырып, ұсынылатын мүмкіндіктер туралы баяндады.
✔️Түркістан облысы – бизнеске бағдарланған аймақ. Өңірде 210 мыңнан астам шағын және орта бизнес өкілі жұмыс істейді. Оның ішінде, 160-тан астам компания шетелдік инвесторлардың қатысуымен іске асырылуда. Сонымен қатар 80 мыңнан астамы – шаруашылық және фермерлік қожалықтар. Соңғы 6 жылда Үкіметтің және облыс әкімінің қолдауының арқасында өңірде инвестиция тарту бойынша ауқымды шаралар атқарылды. 2018 жылдан бері облысқа шамамен 9 миллиард АҚШ доллары көлемінде инвестициялар тартылды. Оның ішінде, 63%-ы – жеке инвестициялар. Инвестициялар өнеркәсіп, жылжымайтын мүлік, ауыл шаруашылығы, туризм және жаңартылатын энергия көздері сияқты салаларға бағытталды.
✔️«UBC Group» компаниясының иесі Игорь Гуменный облыс әкімдігі тарапынан көрсетілген қолдауға алғысын жеткізіп, Түркістан өңірінде тоңазытқыштар өндірісі жобасының сәтті жүзеге асатынына сенім білдірді. «UBC Group» басшылығы 2023 жылы өндірістік алаңдарын Қазақстанда орналастыру туралы шешім қабылдап, жаңа зауыт салу үшін орын іздей бастағанын жеткізді. Түркістан облысының әкімдігімен тиімді жұмыс істеу нәтижесінде Түркістан таңдалғанын айтты. Компанияның тарихы мен жеткен жетістіктеріне тоқталды. Бірнеше бағыт бойынша сәтті жұмыс істеп келе жатқанын мәлімдеп, әлемдік ірі компаниялармен серіктес екенін айтты.
✔️«UBC Group» сусындар мен азық-түліктерге арналған тоңазытқыш жабдықтарын өндіру, жарнамалық материалдарды әзірлеу және өндіру, жабдықтар мен техникалық процестерді жобалау және монтаждау, тоңазытқыш жабдықтарын жаңарту және қызмет көрсету, тауарлары мен қызметтерін сату сияқты бірнеше бағыт бойынша жұмыс істейді.
✔️Форум соңында қатысушылар сұрақтарын қойып, пікір алмасты. Шет мемлекеттерден келген инвесторлар Түркістан облысының инвестициялық әлеуетін оң бағалап, бірлесе жұмыс жасауға ниет білдірді.
