Қазір – ақпараттық технология заманы. Мұның тиімді жағымен қатар қауіптілігі де жоқ емес. Ғаламтор арқылы адамдарды түрлі тәсілдермен алдап-арбап, зардап шектіру оқиғалары көптеп кездеседі. Бәріміз де ұялы телефонды қолданамыз, интернеттің көмегіне жүгінеміз. Сондай сәттерден сақ болған жөн.
Интернеттегі алаяқтардың мақсаты – заңсыз жолмен басқалардың ақшасы мен мүлкін ұрлау. Алаяқтықтың бұл түрі Интернет қызметтерін немесе оған қосылған бағдарламаларды пайдалану арқылы жүзеге асырылады. Интернет-алаяқтардың жымысқы әрекетінен әлемде қаншама адам қаржылық шығынға батып жатыр. Оған тосқауыл жоқ, десе де одан қорғанудың жолдары бар. Интернет-алаяқтық материалдық шығыннан бөлек моральдық шығынға да ұшыратады. Бұл алаяқтың кәсіби деңгейі мен тәжірибесіне байланысты.
Сіз кез келген уақытта қандай да бір жолмен онлайн-алаяқтықтың құрбанына айналып кетуіңіз мүмкін. Сол себепті, барынша абай болу керек және жеке деректердің қауіпсіздігін бақылап отырған жөн.
Бүгінде интернет-алаяқтық қылмысы өзекті мәселелердің бірі. Алаяқтар азаматтардың сеніміне кіру үшін түрлі айла-тәсілдерді қолданады. Соның бірі – Kazpost қызметкері ретінде қоңырау шалу. Алаяқтар жәбірленушіге “сіздің атыңызға сәлемдеме келді” деген ақпарат беріп, 4 санды SMS-кодын сұрайды. Осылайша, жәбірленушінің атына ірі көлемде онлайн несие рәсімдейді.
Интернет-алаяқтық көбінесе пошта қызметкерлерінің атын жамылу арқылы жасалады. Осыған байланысты Kazpost бөлімшелеріне келіп түскен шағымдар саны да артып отыр.
“Полиция қызметкерлерінің интернет-алаяқтыққа қарсы халыққа түсіндіру жұмыстарын жүргізуі біз үшін де өте маңызды. Өйткені мұндай жағдайлар орын алғанда, біздің мекемелерге де көптеген арыз-шағымдар түседі. Азаматтар күмәнді хабарламалар немесе қоңыраулар алған кезде, бізден сәлемдеме келді ме, жоқ па – соны анықтауға тырысады. Өкінішке қарай, оларға алаяқтық фактілері екенін түсіндіру қиынға соғады. Біз өз тарапымыздан түсіндіру жұмыстарын жүргіземіз, бірақ мұндай жағдайда құқық қорғау органдарына хабарласу қажет”, – дейді Kazpost бөлімшесінің өкілі.
Қазіргі таңда интернет пен телефон арқылы жасалатын алаяқтық жағдайлары көбейіп келеді. Алаяқтардың арбауына түспеу үшін сақтық шараларын білу өте маңызды!
Өзіңізді қалай қорғауға болады?
— Бейтаныс адамдарға жеке мәліметтеріңізді бермеңіз;
— Телефон арқылы банк қызметкері ретінде хабарласқандарға сенбеңіз;
— Күмәнді сілтемелерге өтпеңіз және белгісіз қосымшаларды жүктемеңіз;
— Егер алаяқтықтың құрбаны болсаңыз, дереу полицияға хабарласыңыз – 102.
