Облыс орталығында Полиция департаменті басшылығының ұйымдастыруымен маңызды шара өтті. Жиынға департамент бастығының орынбасары Б.Сапар, Жергілікті полиция қызметі басқармасының бастығы Е.Өсербаев пен Түркістан қаласы полиция басқармасының басшылығы қатысты.
Сондай-ақ облысымыздың ақсақалдар алқасының төрағалары, сектор меңгерушілері, пәтер иелері кооперативтері, үй және көше төрағалары, БАҚ өкілдері, қоғамдық бірлестік мүшелері арнайы келді. Полиция басшылығы өз салалары бойынша атқарылып жатқан жұмыстарды баяндады.
Басты тақырып – полиция имиджін нығайтып, тәртіп пен заңдылықты сақтау. Есірткі қылмысына қарсы күрес, интернет алаяқтық, әйелдердің құқықтары мен балалардың қауіпсіздігін қамтамасыз ету. Оған қоса көптеген қылмыстардың негізгі себебіне айналған ішімдікті дүкендерде сатпау сынды мәселелер көтерілді.
Өз кезегінде тұрғындар өтініштері мен ұсыныс-пікірлерін жеткізді. Келіп түскен шағымдарға талдау жасап, оң қорытынды шығару жолдары қарастырылды.
Мемлекет басшысының Жолдауында алаяқтыққа, соның ішінде қаржы пирамидалары мен интернет алаяқтығына қарсы күреске қатысты берілген тапсырмаларға орай дайындалған кешенді профилактикалық жұмыстар жүргізілді.
Қазақстандықтардың күнделікті өмірінде цифрлық технологиялардың кеңінен қолданылуы интернет-алаяқтық пен киберқауіптердің көбеюіне әкелуде. Жыл сайын 20 мыңнан астам интернет-алаяқтық фактісі тіркелсе, оның 80%-ы ашылмай қалып отыр. Осыған байланысты халықтың цифрлық сауаттылығын арттыру мәселесі бұрынғыдан да өзекті бола түсті.
Жиын соңында құқық бұзушылықтар мен қылмыстарды жасауға ықпал ететін жағдайларды жою жөнінде бірлесіп шаралар қабылдауға тапсырмалар берілді.
