Сауран аудандық Полиция қызметкерлері халық арасында интернет-алаяқтықтың алдын алуға бағытталған іс-шаралар жүргізуде. Алаяқтардың айла-амалдары туралы полиция департаменті Киберпол қызметкерлерімен біргелікте кездесулер өткізіп арнайы дайындалған бейнематериалдар көрсетіп,ескерту жұмыстарын жүргізді, деп жазады Түркістан облысы полиция департаментінің баспасөз қызметіне сілтеме жасаған 4tagan.kz ақпараттық агенттігі.
Профилактикалық жұмыс барысында полицейлер азаматтарға брошюралар таратып, қырағылық танытуға шақырды. Қысқаша нұсқаулықта берілген ұсынымдарда жинақ ақшаңыз бен мүлкіңізді алаяқтардан сақтаңыз! деген хабарлама берілген.
Сонымен бірге, ІІМ ұсынымдары: турфирмалар арқылы ұмра мен қажылыққа бару кезінде қалай алаяқтықтың алдын алуға болады?
Қазақстан ІІМ азаматтарға ұмра мен қажылықты турфирмалар арқылы ұйымдастыру кезінде кездесуі мүмкін алаяқтық туралы ескертеді. Қасиетті сапарды ұйымдастыруда сенімді компанияны таңдау маңызды.
Алаяқтардың айласына түсіп, ақшадан айырылып қалмас үшін төмендегі сақтық шараларын ұстану қажет:
— Фирманың лицензиясын және ол туралы пікірлерді тексеріңіз. Мұндай сапарларды ұйымдастырумен айналысатын ресми туристік фирмалардың мемлекеттік лицензиясы болуы керек. Клиенттердің пікірлерін зерттеңіз. Туроператорлар әр туристке туркод ұсынуы тиіс.
— Тым төмен бағаға қызығып, алданып қалмаңыз. Егер сізді төмен бағамен қызықтырса, асықпаңыз, мұндай ұсыныстар көбінесе алаяқтықпен байланысты болуы мүмкін. Түрлі турфирмалардың бағаларын салыстырып, олардың нарықтық бағаға сәйкестігін анықтап алғаныңыз жөн.
— Құжаттар мен келісімшартты тексеріңіз. Барлық келісімшарттарды мұқият оқып шығыңыз. Әрбір тармаққа жіті назар аударыңыз, бұл келеңсіз жағдайлардың алдын алуға көмектеседі. Егер сізге бір нәрсе түсініксіз болса, маманмен кеңесуді ұмытпаңыз.
— Байланыс деректеріне назар аударыңыз. Сенімді турфирманың әрқашан байланыс телефоны, электронды поштасы және нақты мекенжайы болады. Алаяқтар көбінесе байланыс деректерін көрсетпей, виртуалды парақшалардың артында жасырынуы мүмкін.
— Тур бағдарламасын мұқият зерделеңіз. Турдың құнына не кіретінін анықтаңыз (ұшу, тұрғын үй, көлік, тамақтану, медициналық сақтандыру және басқа қызметтер). Барлық қажетті шығындардың ескерілгеніне және кездейсоқ төлемдердің болмайтынына көз жеткізіңіз.
