Президент Қазақстан халқына арнаған Жолдауында Үкіметке коммуналдық инфрақұрылымды жаңғыртуды тапсырды, «Жергілікті өзін-өзі басқару мәселелеріне, қоғамдық кеңестердің, пәтер иелері кооперативтері мен мүлік иелері бірлестіктерінің қызметін өзгертуге айрықша назар аудару қажет. Тұрғын-үйлер мен қала инфрақұрылымын абаттандыру мәселесін қолға алу керек», деген болатын.
Осы орайда, кезекті аралауды Түркістан қаласының әкімі Нұрбол Тұрашбеков М.Әбенова көшесіндегі кәріз жүйесінің құрылысынан бастады. «Capital Construction Projects Kazakhstan» жауапкершілігі шектеулі серіктестігі жоба бойынша 1600 метрге темірбетон құбырларын жүргізуді қолға алып, 1200 метрде жұмысты соңына жеткізді. Қазіргі таңда құрылыс 400 метрде жалғасуда.
Мердігер қажетті жабдықтардың жеткізілгенін, сапа талаптарының сақталып жатқанын баяндады.
Нұрбол Әбдісаттарұлы техникалық қадағалаушы мекеме өкілінің де есебін тыңдап, нысанның өндірістік кестеден кешікпей тапсырылуы қажеттігін ескертті.
Қазіргі таңда Түркістан қаласында орталықтандырылған кәріз жүйесіне қосылған абоненттер саны – 16 336, бұл қала тұрғындарының 36,5%-ын құрайды. Аталған көрсеткішті жыл қорытындысымен 55,8%-ға жеткізу жоспарланып отыр. Осыған сай, бүгінде 17 жоба әзірленіп, 11 нысанның құрылысы жүзеге асуда. Сонымен қатар 4 нысанның жобалау-сметалық құжаттары республикалық бюджетке қаржыландыруға ұсынылған.
Мәдениет үйінің құрылысын бақылау барысында Нұрбол Әбдісаттарұлы жұмысшыларды көбейту қажеттігін тағы ескертті. Қабырғасы қаланып біткен екіқабатты ғимараттың ішкі әрлеуіне, шатыр жабу, терезе орнату жұмыстарына бүгінгі таңда 40-тан астам құрылысшы жұмылдырылған. Аумағы 1,13 гектарды құрайтын 500 орынға шақталған мәдениет үйінде демалыс аймағы, автотұрақ және балалар ойын алаңшасын салу да қарастырылған.
Шаһар басшысы тиісті сала жетекшілеріне Мәдениет үйінің айналасын абаттандыру бойынша ұсыныс беруді тапсырды.
Түркістан қаласында жол сапасын жақсарту мақсатында бірнеше ірі жобалар жүзеге асуда. Солардың бірі — Ә.Жангелдин көшесінің құрылысы.
3800 м ұзындықты құрайтын нысанның құрылысы соңына таяп келеді. Онда екі қабаттан тұратын асфальт жабындысы төселіп, жол жиегінде суағар науалар орнатылды. Жаяу жүргіншілер жолы мен веложол салынып, көше жарықшамдарымен қамтамасыз етілуде.
Сонымен бірге, қала әкімі Нұрбол Тұрашбеков бүгін Ә.Жангелдин көшесіндегі жол құрылысының барысын тексерді. Қазіргі таңда тасты жабындымен тұрған 300 метр аумағында құрылыс қарқын алды.
Нұрбол Әбдісаттарұлы кәріз жүйесінің құбырлары төселген соң, бірінші кезекте жолдың асфальт жабындысын аяқтауды тапсырды.
Сонымен қатар, жол қиылыстары көлік кептелісін туындатпауы қажеттігін ескертіп, жаяулар үшін қауіпсіз өткелдерді және көліктердің қауіпсіз қозғалысы үшін қиылыстарды ыңғайластыруды жүктеді.
