«Халық үніне құлақ асатын мемлекет» тұжырымдамасы мен ашықтық қағидатына сәйкес Түркістан қаласында тұрғындарды мәселелері бойынша қабылдау кестеге сәйкес жүргізілуде. Сонымен бірге Мемлекет басшысы Қасым-Жомарт Тоқаевтың тапсырмасымен елімізде «Таза Қазақстан» экологиялық акциясы аясында атқарылып жатқан жұмыстар да қала әкімінің жіті бақылуында.
Түркістан қаласының әкімі Нұрбол Тұрашбековтің Сауран, Яссы секторларында өткен тұрғындармен кезекті кездесуінде тазалық мәселесі өзекті болды. Жиынға қатысқан қала тұрғындары шаһардың жайнап-гүлденуіне ризашылығын білдіріп, алғыс айтумен қатар әрбір қала тұрғыны қоқыс қалдықтарын арнайы орындарға тастап, қаламызға жанашырлық таныту керектігін айтты. Сонымен қатар, әкіммен кездесуге тұрғындар инфрақұрылым, ойын алаңшалары, атаулы әлеуметтік көмек, жер телімі, тұрғын-үй кезегі және тағы да басқа жеке мәселелерімен келген.
Нұрбол Әбдісаттарұлы кездесуде тұрғындар тарапынан айтылған кейбір мәселелер бойынша арнайы өзі барып тексеретінін жеткізді. Және тиісті сала жетекшілеріне ұсыныстарды заң аясында зерделеуді тапсырды.
Әлеуметтік жағдайларын айта келген, баспанаға мұқтаж көп балалы, мүмкіндігі шектеулі азаматтардың да өтініштерін тыңдаған шаһар басшысы жалпы қала бойынша тұрғын-үй кезегінде 16 364 азамат барын айтты. Баспана орталықтандырылған кезек жүйесіне сәйкес табысталатынын түсіндірді. Кездесуден кейін қала әкімі тұрғындарды жеке мәселелерімен қабылдап, ұсыныс-тілектерін тыңдады.
