Президент Қазақстан халқына арнаған Жолдауында Үкіметке коммуналдық инфрақұрылымды жаңғыртуды тапсырды, «Жергілікті өзін-өзі басқару мәселелеріне, қоғамдық кеңестердің, пәтер иелері кооперативтері мен мүлік иелері бірлестіктерінің қызметін өзгертуге айрықша назар аудару қажет. Тұрғын-үйлер мен қала инфрақұрылымын абаттандыру мәселесін қолға алу керек», деген болатын.
Осы орайда, Түркістан қаласының әкімі Нұрбол Тұрашбеков “Отырар” шағын ауданындағы 5 қабатты 20 үйдің құрылысын бақылап, мердігерлермен кездесті. Өндірістік кестеге сай атқарылуы тиіс жұмыстарды тексеріп, құрылыс саласына жетекшілік жасайтын орынбасары мен бөлім басшысының есебін тыңдады. Ішкі әрлеу жұмыстары басталған үй мердігерлері техникалық талаптардың сақталғанын жеткізсе, қадағалаушы мекеме өкілдері талаптардың бұзылмағанын баяндады.
Өндірістік кестеден кешеуілдеген мердігерге ескерту жасалды, белгіленген мерзімде аяқталмаған тірліктер үшін заңға сәйкес шара көрілетіні ескертілді.
— Құрылысты мерзімінде аяқтау — талап, сапалы аяқтау — басты міндет. Өз отбасыларыңыз тұруға лайықты үй болсын — осындай жауапкершілік сұралады Сіздерден. Қазір баспаналардың біршамасын аралап көрдім, бөлім басшысына кемшіліктер бойынша тиісті тапсырмаларды бердім, дегенмен қателіктерге жол бермеген дұрыс, — деді Нұрбол Әбдісаттарұлы өз сөзінде.
Нысан құрылысы аяқталған соң 800 пәтер мемлекеттік бағдарлама аясында ипотекалық сатылымға шығарылатын болады.
Облыс орталығындағы 61 нысанда құрылыс жұмыстары жүргізілуде. Бұл туралы Түркістан қалалық құрылыс бөлімінің басшысы Нұркен Нақбаев мәлімдеді.
8 әлеуметтік нысан, 3 саябақ, 5 қабатты 20 тұрғын үй құрылысы мен 30 нысанда инженерлік инфрақұрылым жүйелері жасалып жатыр. Бұдан бөлек облыс орталығында 5 спорт кешенінің құрылысы қарқынды жүргізілуде. Аталған нысандар Бекзат мөлтек ауданы, Мақтазауыт, Баянауыл аумағы мен ТГЖД шағын ауданында және М. Мақатаев көшесінде салынуда.
М.Тұрсынов көшесінде орналасқан стадионды реконструкциялау өткізіліп, Отырар мөлтек ауданында 5 қабатты 20 тұрғын үй (800 баспана) бой көтеруде. Сондай-ақ тұрғындар жайлылығы үшін Парасат саябағына реканструкциялау жұмыстары жасалса, шаһардағы саябақтар саны тағы Белсенді демалыс саябағы мен айналма тас жолы бойындағы демалыс аймағымен толығуда.
