Дүниежүзілік денсаулық сақтау ұйымының деректері бойынша, Қазақстан суицидтің саны жағынан үшінші орын алады. Әсіресе, елімізде жастар арасындағы өзін-өзі өлтіру оқиғалары кез-келген басқа елден үш есе көп дейді осы ұйымның сарапшылары. Осы ретте «degdar.kz» сайты қазіргі қоғамға төнген қатер — суицидтің алдын алу және кезек күттірмейтін шаралар туралы былай деп жазады. Бұл туралы abai.kz-ке сілтеме жасаған 4tagan.kz ақпараттық агенттігі хабарлайды. Бірақ, отандық ресми статистика мұндай мәліметтерді жарияламайтыны белгілі.
Бүгінгі күні бұл қауіпті феномен қорқынышты деңгейіне жетті, өкінішке орай, суицидке баратындардың көпшілігі кәмелетке толмаған, яғни 18-ге толмаған жастар. Бұл деректердің ар жағында қаншама адам тағдыры, отбасы қайғысы, елдің болашағы сияқты мәселелер тұр. Сондықтан да осындай теріс оқиғалардың себептерін зерттеп, салдарының алдын алу міндеті күн тәртібінен түспей келеді.
«Дегдар» қоғамдық келісімді қолдау қоры 2015 жылдан бастап Алматы қаласы Ішкі саясат басқармасының үкіметтік емес ұйымдармен әлеуметтік маңызы бар жобаларды жүзеге асыру қызметі бойынша жастар арасында суицидтің алдын алуға бағытталған кешенді іс-шаралар ұйымдастырып келеді. Бұл жұмыс жүйелі түрде жүргізіліп, Алматы қаласы ғана емес, аудан, бірнеше облыс көлеміне шығуы осы бағыттағы жұмыстардың нәтижесіне елеулі ықпал етері анық.
Айталық, өткен жылы осы жоба аясында жастардың өмірлік ұстанымын, дұрыс көзқарастарын қалыптастыру мақсатымен өткізілген «Суицидтің алдын алу», «Өмірге ғашық болу» және т.б. тақырыптардағы дәрістер, семинар-тренингтер, дөңгелек үстел, конференция және т.б. шараларға мыңдаған оқушылар мен студент жастар қамтылды.
