Қаржы пирамидаларымен күрес неге белсенді жүреді? Себебі, пирамидалардан қарапайым халық қана емес, экономика да зардап шегеді. Яғни, халықтың ақшасын қалтасына басып, шетелге қашып кетеді. Сәйкесінше, сыртқа капитал ағыны болады. Сондықтан, Мемлекет тарапынан – пирамидаларға қатысты заң қатаңдатылуы керек. Ал қоғамдағы адамдар тарапынан – қаржылық сауатын арттыруы керек, ең болмағанда қаржылай сауатты адамның кеңесін алған дұрыс, деп хабарлайды dauletten.kz-ке сілтеме жасаған 4tagan.kz ақпарттық агенттігі хабарлайды.
Қазақстанда Қазақстан Республикасының Қаржылық мониторинг агенттігі жыл басынан бері 22 қаржы пирамидасын анықтаған. Бұндай ұйымдардың барын біле тұра, аузы күйсе де, үрлеп ішпейтін қарапайым халық саны азаймай тұр. Керісінше, пирамида саны одан да өрши түсуде.
Осы тұста, макроталдаушы, экономист маман А.Ханетова өз пікірін білдірді.
«Қазіргі таңда пайда болып жатқан қаржы пирамадаларын шынайы компаниялардан ажырату өте қиын. Ол үшін міндетті түрде белгілі бір деңгейде қаржылық сауаттылық керек. Алайда, кей жағдайда сауатты болу да жеткіліксіз. Себебі өте сауатты адамдардың да ақшаларын өз қолымен алаяқтарға бергенін көрдік те, естідік те. Өйткені қазір адамдарға «бұл жаңадан ашылған компания, сіз міндетті түрде басында кіргеніңіз үшін ұтасыз» деп ақылға қонымсыз пайда сомаларын айтып қызықтырады», – деді маман.
Қаржы пирамидасын басқа ұйымдардан қалай ажыратуға болатынын назарларыңызға ұсынамыз.
Қаржы пирамидаларының негізгі белгілері қандай?
- Көрсететін қызметіне ресми лицензиясы болмау;
- Тез әрі тым жоғары табыс табуды ұсыну;
- Ұйым туралы қаржылық ақпаратты жасыру;
- Ұйымды агрессивті түрде, әсіресе, чаттар арқылы жарнамалау;
- Пайданы жаңа кірген адамдардың салымынан беруді жоспарлау.
