21 ғасырдағы ақпараттық технологиялар дәуірінде сананы манипуляциялау жаңа деңгейге көтеріліп, қоғам үшін үлкен сынаққа айналды. Жаңалықтар, әлеуметтік желілер мен цифрлық технологиялар араласқан ақпараттық кеңістікте манипуляция ұжымдық және жеке санаға әсер етудің қуатты құралы болды. Қазір тіпті жарнамалық технологиялардың қолданушылардың деректерін пайдалануы манипуляцияны күшейткенін көріп отырмыз. Осылайша, адам санасына психологиялық әсер ету әдістері барған сайын жетіліп, өнімдер мен қызметтерге қатысты кез келген пікір қалыптастыруға мүмкіндік береді. Осы ретте бүгін ақпарат кеңістігіндегі манипуляция түрлеріне шолу жасаймыз, деп жазады stan.kz сайтына сілтеме жасаған 4tagan.kz.
Адамдардың назарын аударту мақсатындағы күрес цифрлық дәуірдегі басты шайқасқа ұласты. Толыққанды желіге қолжетімділік, хабарландырулар сияқты технологиялар ақпарат ағынына тәуелділікті тудырады. Нәтижесінде ақпаратты шамадан тыс тұтынамыз, бұл манипуляцияның тиімділігін әрі өтімділігін арттырады, өйткені адамдар сырттан келетін әсерге төтеп бере алмай қалады. Тіпті күнделікті өмірде адамдар манипуляция құрбанына айналғандарын сезінбеуі де мүмкін.
Маркетингтегі эмоция
Көңіл-күйдің көтеріңкі болуы да сауда жасауға айтарлықтай әсер етеді. Сондықтан компаниялар жарнаманы көңілді заттармен байланыстыруға тырысады.
Адамдар әр уақытта бақытты болуға ұмтылады, маркетологтар да мұны жарнамада пайдалануға тырысады. Сондықтан кез келген өнімді сатып алмас бұрын өзіңізге «Бұл менің өмірімді жеңілдете ме? Менің барлық мәселемді шеше ме?» деген секілді сұрақтарды қойып көріңіз. «Жоқ» деп жауап берсеңіз, сізге жарнамадағы манипулцияның әсер еткені.
