Қоғамда көбіне жалған ақпаратты тарататын адамдар заңнан бейхабар, желсөзге құмар, агрессияға дайын тұратын адамдар осы нәрселерді пайдалану арқылы өзіне ұпай жинаймын деп ойлайды да, өзінің өміріне тікелей зиян келтіретінін білмейді. Мұндай ақпараттар қоғамға үрей тудыру мүмкіндігін немесе ол ақпараттың астында қандай да бір үгіт-насихат жатқанын, қоғамға қауіп төндіретін үндеу жатуы мүмкін екенін, жалған ақпараттың артында үлкен зардап барын түсініп, бұл ақпараттарды тексермей жатып таратудан аулақ болу керек. Естіп тұрса да, оған қатысты дерек, пікір білдіруден сақ болу қажет. Жалған ақпарат таратуға қарсы жаза БАҚ өкілдеріне де, қарапайым халыққа да бірдей заңмен қарастырылады», – дейді заңгер Камиша Есмұхамедқызы.
Сонымен қатар адамдар тобының алдын ала сөз байласуымен, адам өзінің қызмет бабын пайдалана отырып және бұқаралық ақпарат құралдарын немесе телекоммуникациялар желілерін пайдалана отырып таратылған жалған ақпарат үшін – 3 мың айлық есептік көрсеткішке дейінгі мөлшерде айыппұл салуға, не сол мөлшерде түзеу жұмыстарына не 800 сағатқа дейінгі мерзімге қоғамдық жұмыстарға тартуға, не 3 жылға дейінгі мерзімге бас бостандығын шектеуге, не сол мерзімге бас бостандығынан айыруға жаза көрсетілген.
Қылмыстық кодекстің дәл осы 274-бабының бірінші немесе екінші бөліктерінде көзделген, азаматқа, ұйымға немесе мемлекетке ірі залал келтіруге немесе өзге де ауыр зардаптарға әкеп соққан іс-әрекеттер – 5 мың айлық есептік көрсеткішке дейінгі мөлшерде айыппұл салуға, не сол мөлшерде түзеу жұмыстарына, не 1200 сағатқа дейінгі мерзімге қоғамдық жұмыстарға тартуға, не 5 жылға дейінгі мерзімге бас бостандығын шектеуге, не сол мерзімге бас бостандығынан айыруға жазаланады. Сонымен қатар төтенше жағдай кезінде немесе ұрыс жағдайында немесе соғыс уақытында не жария іс-шаралар өткізу кезінде жасалған іс-әрекеттер – 3 жылдан 7 жылға дейінгі мерзімге бас бостандығын шектеуге, не сол мерзімге бас бостандығынан айыруға жазаланатыны туралы аталған баптың бірінші, екінші немесе үшінші бөліктерінде көзделген.
