Сенат депутаттары екі оқылымда «Онлайн-платформалар және онлайн-жарнама туралы» заң қабылдады.
Қазақстанда блогерлер жалған ақпарат таратқаны үшін әкімшілік жауапқа тартылады.
Заңда Қазақстан Республикасының Әкімшілік құқық бұзушылық туралы кодексі жаңа 456-2 баппен толықтырылды. Онда онлайн платформа пайдаланушылары мен блогерлерге жалған ақпарат таратқаны үшін әкімшілік жауапкершілік қарастырылған.
Жаңа заңға сәйкес, жалған ақпарат таратқандарға 20 АЕК сомасындағы айыппұл төлеуден бастап, 7 жылға бас бостандығынан айыруға дейінгі жаза көзделген.
Ақпарат тұтынушылардың көбі мәліметтің рас-өтірігін ажырата алмайды. Әсіресе, апатты және төтенше жағдайлар, саяси оқиғалар кезінде әлеуметтік желілер мен мессенджерлерде жалған хабарламалар көптеп тарайды. Қазақстан заңнамасына сәйкес, фейк ақпарат таратқандар жазаланады.
Десе де, көп адам мұндай әрекеті үшін қылмыстық жауапкершілікке тартылатынынан бейхабар.
Әкімшілік айыппұл сомасы:
жеке тұлғалар үшін 20 АЕК;
кәсіпкерлік қызметпен айналысатын блогерлер үшін – 30 АЕК;
шағын кәсіпкерлік субъектілері, коммерциялық емес ұйымдар үшін — 40 АЕК;
орта кәсіпкерлік субъектілері үшін – 80 АЕК;
ірі кәсіпкерлік субъектілері үшін-100 АЕК.
Сондай-ақ бір жылда қайтадан құқық бұзғаны үшін:
жеке тұлғаларға — 40 АЕК немесе 10 тәулікке дейінгі мерзімге әкімшілік қамауға алу;
блогерлерге — 15 АЕК мөлшерінде айыппұл немесе 15 тәулікке дейінгі мерзімге әкімшілік қамауға алу;
шағын кәсіпкерлік субъектілері мен коммерциялық емес ұйымдарға — 60 АЕК;
орта кәсіпкерлік субъектілеріне — 120 АЕК;
ірі кәсіпкерлік субъектілеріне — 250 АЕК көлемінде айыппұл салынады.
