Елімізде білікті мамандарды ауылдық өңірлерге тарту мақсатында “Дипломмен ауылға” бағдарламасы іске асырылып келеді. Өткен жылы Келес ауданында 60 маманға (310 млн 500 мың.теңге) тұрғын үй сатып алуға бюджеттік несие және 94 маманға (32 млн 430 мың.теңге) көтерме жәрдемақы берілген.
– Қазақстан Республикасы Ұлттық экономика министрлігінің бұйрығына сәйкес, 2023 жылғы 1 сәуірден бастап “Дипломмен ауылға” жобасының сенімді өкілі болып “Отбасы банк” АО белгіленген болатын. Енді азаматтардың уақытын үнемдеу және оларға мемлекеттік қолдауды алу процесін жеделдету үшін “Дипломмен ауылға” жобасы цифрлық форматқа ауыстырылды. Жаңа өтінімдер “otbasybank.kz” жылжымайтын мүлік порталында онлайн режимде қабылданатын болады, — дейді аудандық экономика және қаржы бөлімінің өкілі Ерболат Илияс.
Айта кетейік, биыл Келес ауданында 75 маманға тұрғын үй сатып алуға не салуға бюджеттік несие және 150 маманға көтерме жәрдемақы беру жоспарлануда. Биыл аудан орталығына бір жолғы көтерме жәрдемақы — 100 АЕК, бюджеттік несие — 2500 АЕК мөлшерінде, ал ауылдық округтегі елді мекендерге – 2 000 АЕК көлемінде 15 жылға дейінгі мерзiмге 0,01% мөлшерiндегі жылдық сыйақы мөлшерлемесімен тұрғын үй сатып алуы немесе салуы үшiн кредиттiк шарттар жасау көзделген.
