Бүгін Жетісай ауданының әкімі Серік Үсенұлы Мамытов пен аудандық мәслихат төрағасы Медет Қасымов аудандық жұмыспен қамту және әлеуметтік бағдарламалар бөлімінің «Асыл қазына және Тең қоғам» әлеуметтік қызметтер көрсету орталығына қарасты «Тұрмыстық зорлық-зомбылық құрбандарына арнаулы әлеуметтік қызметтер көрсету» бөлімшесінде болып, жұмыстарымен танысты. Ұжыммен кездесіп, ұсыныс-пікірлерін тыңдады. Жұмыс сапасын жақсарту мақсатында еркін форматта пікір алмасты.
Өткен жылдың желтоқсан айынан жұмысын бастаған бөлімше ауыл әкімдіктермен бірлескен түрде аз қамтылған отбасыларға қолдау көрсетіп, мемлекеттік қайтарымсыз гранттарға қатысып өз кәсіптерін ашуларына, тұрақты табысқа қол жеткізулеріне, цифрлық қызметтер мен жұмыспен қамтылуларына көмектесу, еңбекке баули отырып заңгерлік-медияциялық, құқықтық, психологиялық және қаржылық сауаттылықты арттыру көмектерін көрсетеді. Мемлекеттік бағдарламалармен таныстырып, тақырыптық семинар-тренингтер өткізеді.
Бұған дейін ауданда 14 тақырыптық семинар-тренингтер мен түрлі бағыттағы іс-шаралар өткізіп, орталыққа жүгінген 4 отбасыға тиісті көмектер көрсеткен бөлімше басшысы Ақбаян Жакипованың айтуынша алдағы уақытта отбасыларға әулеуметтік қолдау көрсету мақсатында СММ менеджері кәсібі мен тігін ісін (киім тігу, перде тігу, төсек жабдығын тігу) меңгерту, ерлер және әйелдер шаштаразы мен кондитерлік өнімдерді дайындау мамандарын оқыту, қызмет көрсету нысандарының мамандары – кассир, сатушы, даяшы, менеджер, клининг қызметкерлері мен бала күтушілерді дайындау, массаж жасау мен үй жағдайында шағын жылыжай ісін қолға алу, үй жағдайында жібек құртын өсіру, киізден жасалған бұйымдар мен құрақ құрау, қол кілем тоқу кәсібіне баулу секілді жұмыстардың жоспарланып отырғанын жеткізді.
Жүздесу соңында аудан басшысы ашылғанына көп бола қоймаса да бірқатар жұмыстар атқарып, ауқымды жобаларды қолға алып отырған мекемеге арнайы ғимарат қарастыруды, жағдай жасауды, тұрмыстық зорлық-зомбылыққа қарсы жұмыстарды күшейтуді аудандық жұмыспен қамту және әлеуметтік бағдарламалар бөлімінің басшысына тапсырды.
