Бәйдібек ауданының әкімі Ерлан Нұрмаханов Жамбыл ауылдық округіне іссапармен барды. Округке қарасты Жүзімдік, Жамбыл, Шыбыт, Тасқұдық және Қызылжар елді мекендерінде болып, тұрғындармен кездесті. Ашық пікір алмасып, өтініштерін тыңдап, көтерілген мәселелерді аралап көрді. Шешу жолдарын талқылап, жауаптыларға жоба әзірлеп, ұсыныс беру тапсырылды.
Аралау барысында бірқатар елді мекендегі ауыз судың сапасы, жарамсыз құбырларын ауыстыру, электр жарығы қуатының төмендігі, жайылымдық жер, трансформатор мен бағаналарды ауыстыру, ішкі көше жолдарына тас пен асфальт төсеу, аяқ жол, көше жарығы, саябақ, клуб салу, орталықтағы мәдениет үйін жөндеуден өткізу, инфрақұрылым және басқа да әлеуметтік мәселелер көтерілді.
Аудан әкімінің Жамбыл ауылдық округін аралау барысында сала бойынша орынбасары, бөлім, мекеме басшылары мен ауыл әкімі бірге болып, тұрғындар тарапынан айтылған мәселелердің шешу жолдары талқыланды. Жан-жақты зерделеп, заңдылығын қарап, орындау жөнінде жауапты бөлімдер мен мекеме басшыларына тапсырма жүктеді.
Ерлан Нұрмахановтың Жамбыл ауылдық округін аралау барысында берген тапсырмалары мен тұрғындар тарапынан айтылған ұсыныс-пікірлері және көтерілген өзекті мәселелері хаттамаға енгізілді.
Аудан басшысы Ерлан Заипұлының елді мекендерді аралауы алдағы күндері аудандағы басқа ауылдық округтерінде жалғасын табады.
