Қазақта салт-дәстүр көп. Әрбір дәстүрі өнеге, тәлім-тәрбие көзі болып саналады. Әр сөзін ым-ишарамен білдіретін, көзбен-ақ түсінісетін қазақтай көреген халық аз шығар.
Ұлтты ұлт етіп қалыптастыратын оның салт-дәстүрі мен әдет-ғұрыптары екенін ескерсек, балаларымыздың бойына осынау құндылықты жастайынан сіңіру – біз үшін үлкен міндет.
Бала тәрбиесінің алғашқы алтын қазығы негізінен отбасыда қаланады. Одан кейінгі тәрбиені балабақшалар мен мектептерден үйренеді. Отбасыдағы тәрбие баланың алдағы бүкіл өмірінің темірқазығы болса, балабақшада алған білімі оның болашақ бағдаршамы. Солай екен, баланы ұлттық құндылықтармен сусындатып өсіру әрбір ата-ана мен бала тәрбиесіне жауапты балабақша тәрбиешілерінің, мектеп мұғалімдерінің басты міндеті деп білеміз.
Осы орайда Қазақстан халқы Ассамблеясы ХХХІІ сессиясының шешімімен әзірленген «Біз түрліміз, бірақ теңдейміз», «Бірлігіміз әралуандықта» қағидаларын іске асыра отырып, Түркістан облысы, Мақтаарал ауданы, Мырзакент кентінде орналасқан №7 «Шолпан» балабақшасында «Шаңырақ» отбасылық байқауы өтті.
Байқаудың мақсаты – Қазақстан халықтарының ауызбіршілігі мен сыйластығын арттыра отырып, қазақтың төл мәдениеті мен салт-дәстүрін насихаттау. Салт-дәстүрдің бала тәрбиесіндегі ықпалын арттыру.
Байқауға түрлі ұлт отбасылары қатысып, өздерін таныстырып, өнерлерін ортаға салды. Қазақ халқының әдет-ғұрыптарынан көрініс көрсетіп, мақал-мәтелдер, ырым-тыйым сөздері мен ұлттық құндылықтарына тоқталды. Қазақтың бай дәстүріне байланысты сұрақтарға жауап беріп, бала тәрбиесі мен отбасыдағы дәстүр сабақтастығы жайлы ой өрбітті.
Салт-дәстүрімізді дәріптеу мен оны жандандыру мақсатында өткізілген игі істің үлкен-кішісі болмайды. Демек, бала тәрбиесі жолында отбасы да, балабақша да, мектеп пен институт та белсене жұмыс істесе, ұлттық құндылықтарымыз өміршең болары сөзсіз.
Б.НҰРҚАБЫЛҚЫЗЫ,
№7 «Шолпан» бөбекжай бақшасының
педагог-психологы.
Мақтаарал ауданы.
