Келес ауданы әкімінің орынбасары Даурен Сариевтің төрағалығымен міндетті әлеуметтік сақтандыру мәселелері бойынша жиын өтті. Жиынға аудандық аурухананың бас дәрігері Сәуле Исахова, Келес ауданы бойынша кірістер басқармасының басшысы Азамат Қайыпжан, ауыл, ауылдық округтерінің әкімдері мен ауылдық округтерінің есепші мамандары қатысты.
Жиын барысында ауданның бас дәрігері Сәуле Исахова бүгінде аудандағы әрбір азамат үшін сапалы және қолжетімді медициналық көмекті қамтамасыз ету мақсатында түрлі медициналық көмек алудың мүмкіндіктерін түсіндіріп, өңірде денсаулық сақтауды дамыту жөніндегі алдағы жоспарларға тоқталды.
— Сақтандырылмаған азаматтарға кез-келген уақытта профилактикалық медициналық тексерулерден өту, консультативтік-диагностикалық көмектерді қабылдау (қымбат зерттеулер, компьютерлік томография, ультра дыбыстық зерттеу және т.б), жоғары мамандандырылған медициналық көмек (үй стационары, күндізгі стационар, тәулік бойы жұмыс істейтін аурухана), медициналық реабилитациядан өтуде кедергі келтіреді. Ал сақтандырылған азаматтар сапалы, тегін медициналық көмектерді қолданып отыр. Атап өтсем, ии тамырларына эндоваскулярлық операциялардың құны – 5,8 млн теңгені құраса, сақтандырылған азаматтар Түркістан облысы бойынша 6 операция тегін өтті. Сонымен қатар, құны жоғарыда атаған суммаға тең Эндоваскулярлық эмболизация немесе бас пен мойынның тамырлы окклюзиясы операциясын облыс бойынша 38 азамат тегін өткізді. Биыл Келес ауданының тұрғындарынан Түркістан облысы бойынша Қордың филиалына 90 өтініш түсті. Оның ішінде, консультациялық сипаттағы мәселелер – 50, арыз-шағымдар – 16, алғыс айту – 24 құрайды, — деді бас дәрігер.
Өз кезегінде аудан әкімінің орынбасары, міндетті әлеуметтік сақтандыру мәселелері бойынша жұмысшы топтың төрағасы Даурен Нұрланұлы аудан бойынша шағын және орта бизнес өкілдерімен ауыл шаруашылығы және кәсіпкерлік бөлімімен бірлесе отырып, кездесулер өткізіп, МӘМС жүйесі үшін жанраларды ай сайын төлеу қажеттілігі туралы түсіндірме жұмыстарын жүргізуді тапсырды.
