Бүгінгі күні ауданымыздағы қыз-келіншектер арасында қолдан бұйымдар жасау ісі артып келеді. Солардың бірі — Кеңестөбе ауылының тұрғыны Мөлдір Торланбаева.
Мөлдірдің негізгі жұмысы — Кеңестөбе ауылындағы Қарсыбай Сыпатаев атындағы мектептің «көркем-еңбек пәнінің» мұғалімі. Жұмыстан тыс уақытта қолөнер бұйымдарын жасаумен айналысады.
— Мектепте еңбек пәнінің ұстазымын. Бұл пәнде қандай сабақ өтілетіні сұрамаса да белгілі. Қолымнан түрлі бұйымдар жасау ісі келетіндіктен ұстаздықтан бөлек, гүлдермен көмкерілген бөлме шамдарын жасауды қолға алдым. Қыр-сырын меңгеру мақсатында ғаламтордан ізденіп, арнайы сабағын оқыдым. Еңбектенгеннің нәтижесінде тез үйреніп, әдемі бөлме шамдарын жасаумен айналысып келе жатқаныма бір жылға жуық уақыт болды. Осы уақытқа дейін 100-ден аса гүлдермен көмкерілген бөлме шамдарын жасадым. Гүлдерден бөлек, қабырға суреті және құстар бейнеленген шамдар жасаймын. Мектептегі мұғалімдік жұмысыма кедергі болмауы үшін түскен тапсырысты бос уақытымда жасаймын. Бір айда 20-25 бөлме шамдарын жасаудамын. Күн санап сұраныс та артуда. Гүлдердің материалын Ресей мемлекетінен алдырамын. Изалон материалы өте төзімді, жууға ыңғайлы, түсін бермейді. Жалпы, адам жақсы өмір сүру үшін жан-жақты ізденісте еңбек етуі керек. Еңбектің — наны тәтті, Еңбектенсең ғана болашағың жарқын болады, — дейді Мөлдір Сейітқұлқызы.
Жасаған бұйымдарымен облыстық байқауларда жүлделі орындардан көрініп жүрген Мөлдірдің шәкірттері де облыстық байқауға қатысып, «Алтын қазына» балалар шығармашылығында «гүлдер композициясын» құрастыруды жоғары деңгейде қорғап, 1-орынды иеленген.
Сондай-ақ, Қарсыбай Сыпатаев атындағы мектепте «Қыз еркем, ісімен көркем» үйірме тобында шәкірттер тәрбиелеуде. Мектептен бөлек, ғаламтор арқылы гүлдермен көмкерілген бөлме шамдарын жасауды үйренемін деген талапкерлерге сабақ береді.
