Түркістан облысының құрылғанына 5 жыл толуына орай және «АLTYN KÚZ – 2023», «Қала күні» мерекелік іс-шаралары аясында Жетісай қаласындағы «Жеңіс» алаңында Жетісай ауданы әкімдігінің қолдауымен аудандық кәсіпкерлік бөлімінің ұйымдастыруымен аудан кәсіпкерлері өндірген өнімдерінің көрме-жәрмеңкесі болып өтті.
Нақтырақ айтар болсақ, мерекелік шарада «КазИнновацияЛидер» ЖШС синтепон өнімдері, «Медеу» ЖК термоқаптағыш панелдері, «Марат» ЖК жиһаз бұйымдары, «Мақтаарал қыш зауыты» ЖШС күйген қыш өнімдері, «Бегалы» ЖК синтетикалық жуғыш заттары, «Атамекен МК» ЖШС медициналық мақта өнімдері, «Техас балы» ЖШС бал және «Медет Сүт» ЖШС сүт өнімдері мен «Хаят Р.У.Ж» ЖШС аяқ киім өнімдері көрмеге қойылды.
Сонымен қатар, көршілес Ордабасы ауданының «Ордабасы құс» ЖШС өкілдері де өздерінің 30-ға тарта өнім түрлерінің 1,5 тоннасын көрме-жәрмеңкеде Жетісай ауданының тұтынушыларына ұсынды.
Одан бөлек, қаладағы мейрамханалар мен қоғамдық тамақтану орындары да ұлттық тағамдар мен мерекелік дастархандарының мәзірін дайындап, келушілерге 500 келі палау тегін тарадылды.
Сонымен бірге, ісшара аясында Жетісай қаласындағы «Жеңіс» орталық алаңында бауырсақ көрмесі ұйымдастырылды.
Аталмыш көрмеге Жетісай қаласына қарасты мейрамхана ұжымдары ұлттық тағамдар мәзірімен қатар ши бауырсақ, тұшпара, шай бауырсақ, жол бауырсақ және «монастырьская изба» секілді бауырсақ түрлерін қойды.
Жұртшылықтың назарын ерекше аударып, қызығушылығын тудырған түйенің, биенің сүттеріне иленіп пісірілген тіл үйірер «Америка бауырсағы», «Үнді бауырсағы», «Қырым» және «Тәжік», «Өзбек» бауырсақтары болды.
