Созақ ауданының 95 жылдық мерекесі аясында Созақ ауылында заман талабына сай жабдықталған 1030 орындық спорт алаңы ашылып, ел игілігіне ұсынылды.
Спорт нысанының ашылу салтанатында аудан әкімі Мұхит Тұрысбеков барша ауыл тұрғындарын жаңа нысанның ашылуымен құттықтады.
«Биыл аудан көлемінде спорт саласы бойынша тиісті жұмыстар атқарылды. Бірқатар балалар ойын алаңы мен футбол алаңшалары ашылды. Бүгін, міне, 1030 орынға арналған үлкен футбол алаңы ел игіліне ұсынылып отыр. Аудан жастарының болашаққа деген сенімін нығайтып, бос уақытын тиімді пайдалануға мүмкіндік беретін жобалар әр кез назардан тыс қалмайды», деді аудан басшысы.
Аудандық мәслихат төрағасы Ордабек Жәмиев пен ауыл қариясы Мұрат Жақсыбаев ізгі тілектерін арнады. Сонымен қатар қазақ елінің мақтаныштары, бокстан әлем чемпионы Біржан Жақып және футболдан Қазақстан құрамасында жасындай жарқыраған талантты ойыншы Таңат Нөсербаев шараға арнайы қатысып, құттықтауларын жеткізді. Өскелең ұрпақ салауатты өмір салтын ұстанып, жаңа нысан тәнін шынықтыратын орынға айналатынына өз сенімдерін білдірді.
Ауылдың белсенді азаматы Балкерім Пернебаева ауыл жастары атынан игі іске арқау болған азаматтарға өз алғысын жеткізді. Жасөспірімдер арасында футболдан жарыс ұйымдастырылып, жүлделі орын иеленген командаларға арнайы кубок, медальдар табысталды.
Айта кетейік, жаңа нысанның құрылысы өткен жылы басталған. Мұнда жастар мен жасөспірімдердің футбол ойнап, спортпен шұғылдануына барлық мүмкіндік қарастырылған. Заманауи стадион 1030 адамға лайықталып салынған. Жаттықтырушылар мен төрешілерге жеке кабинеттер, командалардың киім ауыстыруы мен жуынуына арналған арнайы бөлмелер әзірленген. Бұдан бөлек жаттығу залдары, «Street workout» және баскетбол алаңдары бар.
Сонымен бірге, Отырар ауданы Темір ауылындағы «Темір» жалпы білім беретін орта мектебі аумағынан күрес залы ашылды. Игі іске аудандық мәслихат депутаты Ардақ Әмзе мұрындық болған. Ұзақ уақыттан бері бос тұрған бұрынғы оқу ғимараты жөндеуден өтіп, күрес залы ретінде пайдалануға беріліп отыр.
Күрес залының ашылуына аудан әкімі Сәкен Асылханұлы мен аудандық мәслихат төрағасы Уалихан Жамалханұлы мен аудандық мәслихат депутаттары қатысты.
Аталған күрес залында 40 бала спортпен шұғылданады. Жеткіншектердің қол жеткізген жетістіктері де аз емес.
Мұнан соң Шәуілдір ауылы мен Көкмардан ауылын жалғайтын «Селкілдек көпір» маңында ашық спорт алаңы ашылып, ел игілігіне берілді. Онда балалардан бөлек ересектердің де дене жаттығуларын жасауына жағдай жасалған. Шарада аудандық қоғамдық кеңес төрағасы Жалғасбай Көлбай халықтың тілегін орындап, демеушілік жасап, елдің алғысын алып жүрген халық қалаулылары мен ел азаматтарына ризашылығын білдіріп, ақ батасын берді.
