Мемлекет басшысы Қасым-Жомарт Тоқаев «Әділетті Қазақстанның экономикалық бағдары» атты Қазақстан халқына арнағанЖолдауында «Әділдік, инклюзивтік және үнемшілдік жаңа экономикалық бағдарымыздың өзегіне айналады. Қазақстанның экономикалық дамуының жаңа парадигмасы еліміздің бәсекелік артықшылықтарын тиімді пайдалануға және өндіріс саласындағы еңбек, капитал, ресурстар, технология сияқты негізгі факторлардың әлеуетін барынша ашуға негізделеді» деді.
Еліміздің туристік әлеуетін тиімді пайдалану керектігін тілге тиек еткен Мемлекет басшысы осы маңызды салада басқа мемлекеттермен салыстырғанда кейін қалып кеткенімізді ескертті. Осыған байланысты жобаларды тиімді қолдау шараларын қайта қарап, орындалу мерзімдерін нақты айқындау керек. Елде туризмді дамыту үшін шетел инвесторларын және еліміздің бизнес өкілдерін көптеп тартқан жөн.
Президент экономиканың құрылымына қатысты реформаның негізгі тұстарына тоқталып өтті. Қазіргі таңдағы ең басты міндет – еліміздің мықты өнеркәсіптік негізін қалыптастыру және экономиканы өзімізді толық қамтамасыз ете алатын жағдайға жеткізу. Бұл тұрғыда экономиканы әртараптандыру бұрынғыдан да маңызды міндетке айналуда.
Сонымен қатар Президент автокөлік жолдарының сапасы сын көтермейтініне, тиісті жұмыстар уақтылы және сапалы атқарылмайтынына қынжылыс білдірді. «Жемқорлық белең алып тұр, бәсеке де жоқтың қасы. Мұның бәрі – осы салада әбден тамыр жайған кемшіліктер» деді Мемлекет басшысы.
Н.ЖҮСІПБАЕВ, жеке кәсіпкер.
