Мемлекет басшысы Қ.Тоқаев кәсіпкерлікті жүйелі түрде қолдау мақсатында бірқатар тапсырмалар беріп, дәстүрлі Жолдауларында ерекше пәрмен беріп отыр.
«Қарапайым заттар экономикасы» мемлекеттік бағдарламасы аясында Түркістан облысында кәсібін кеңейтіп, жұмысын сәтті жүргізіп жатқан өндіріс орындарының саны артуда.
Орта және шағын бизнесті дамыту – өңірдегі жұмыссыздықты жоюда, нарықты халыққа қажетті тауарлармен толтыруда, өңірлердің экономикасын тұрақтандыруда шешуші фактор. Сондықтан да еліміздегі шағын және орта бизнесті дамыту мәселесіне жан-жақты жағдай жасалып, Түркістан облысының әкімі Дархан Амангелдіұлы тарапынан да айрықша назар аударылып отыр. Осы тұрғыда қабылданған мемлекеттік бағдарламалар мен жан-жақты қолдаулар жеке кәсіппен шұғылданамын, кәсібімді кеңейтемін деушілерге мол мүмкіндіктерді қарастырған.
Түлкібас ауданында құлпынай өсіріп, одан пайда көріп отырғандардың қатары артып келеді. Мәселен, биыл аудан аумағына 5 кәсіпкер 10 гектардан астам аумаққа тамшылатып суғару әдісімен құлпынай еккен.
Солардың қатарында Майлыкент ауылдық округіне қарасты «Дихан» шаруа қожалығы да бар. Қожалық төрағасы Диханбек Дауырбаев есімді кәсіпкер жуырда 2 гектар жерге 70 мың түп құлпынай отырғызған. Онда альбион, азия, клери түрлері бар. 2024 жылы ол жерден тәулігіне 1 тоннаға дейін өнім алуды көздеп отыр.
Диханбек кәсіптің бұл түрін 2 жылға жуық уақыт толық зерттеп, алғашқысын 20 сотық жер теліміне егіп, өнім алып келгенін айтып отыр. Келесі жылы мұнымен тоқтап қалмай құлпынай алқабын 1 гектарға ұлғайтып, сонымен қатар қосымша 4 гектар алқапқа таңқурай егуді жоспарлауда. Бүгінде таңқурай көшеттерін өндірумен айналысатын алматылық шаруалармен келіссөз жүргізген.
Алқап басында кәсіпкермен аудан әкімі Нұржан Ізтілеуов арнайы барып, пікір алмасты.
Алдағы жоспарларын тыңдап, мемлекет тарапынан қолдау қажет болған жағдайда заң талаптарына сай көмек беруге дайын екенін жеткізді.
