Бүгінде Түркістан облысының таңғажайып табиғатымен ерекшеленетін Түлкібас ауданында барлық салалармен қатар мал шаруашылығы қарқынды дамып, бұл бағыттағы кәсіппен айналысатындар қатары артып келеді.
Осы орайда, Түлкібас ауданының әкімі Нұржан Ізтілеуов «Баян-Сұлу» ЖШС-нің төрағасы Данияр Байтілеудің жұмыстарымен танысып, алдағы атқарылатын шаруаларды пысықтады. Жобаның бастамашысы құрылыс-монтаж жұмыстарын нормативтік құжаттарды орындамай аяқтаған.
Сонымен қатар, 400 млн.теңге сомасында несие алып, «Ангус» тұқымдымды ірі қара малды бордақылау ісімен айналысып отыр. Жыл басында 700 басты бордақылаудан бастаған кәсіпкер, бүгінде 230 басын сойып, ет бағытында өткізсе, қалған 470 басын тиісті салмаққа жеткенше бордақылауда. Аталмыш серіктестікте 25 адам жұмыспен қамтылып, тұрақты түрде еңбек ақыларын алуда. Алдағы уақытта серіктестік кәсібін кеңейту мақсатында ауқымды жобаларды іске асыруды жоспарлап отыр. Яғни, Украина елінен сүт бағытындағы 200 ірі қараны елімізге алып келмекші.
Аудан басшысы Нұржан Жақсылықұлы бұл жобаны қолдайтынын жеткізіп, әкімдік тарапынан барлық қолдау заң аясында жүзеге асырылатын мәлімдеді. Жауапты сала мамандарына нақты тапсырма беріп, осы жоба негізінде тиісті жұмыстарды атқаруды міндеттеді.
Айта кетейік, бүгінде Түлкібас ауданында 4 ірі мал бордақылау алаңы, 121 үй іргелік мал бордақылау қоралары бар.
