Мемлекет басшысы Қ.Тоқаев қолжетімді және сапалы біліммен қамтамасыз ету мәселесін әрдайым басты назарда ұстап келеді. ҚР Президентінің 2022 жылғы қарашада бекітілген «Әділетті Қазақстан: бәріміз және әрқайсымыз үшін. Қазір және әрдайым» сайлауалды бағдарламасын іске асыру жөніндегі іс-қимыл жоспарында да білім саласына басымдық берген.
БАҚ өкілдері мен әлеуметтік желі белсенділері Мақтаарал ауданына жасаған пресс-тур барысында Бірлік ауылдық округіне қарасты Өркениет ауылында орналасқан 200 орындық жаңа мектептің құрылысымен танысты.
Мектептің құрылысы 2022 жылдың маусым айында басталған. Ағымдағы жылдың соңына дейін пайдалануға беру жоспарлануда. Нысанның құрылысын мердігер «Нүрі-Л-Жетісай» ЖШС-і жүргізіп жатыр. Ал, тапсырсы беруші — облыстық құрылыс басқармасы. Нысанның конкурстық құны 1 миллиард теңгені құрайды.
Жаңа мектеп ғимаратында оқушылар үшін барлық жағдайлар қарастырылатын болады. Физика, химия, информатика, технология кабинеттері, мультимедиялық және лингафондық кабинеттері соңғы үлгідегі технологиялармен жабдықталады. Сондай-ақ, кітапханасы, спорт залы, асханасы бар.
Жалпы мұнда оқушылар түрлі спорттық, өнер және қолөнер үйірмелеріне қатысып, өздерін қосымша дамытуға мүмкіндіктер қарастырылады. Нысанның сыртқы көрінісіне, жарықтандыру, абаттандыру жұмыстарына да ерекше көңіл бөлінбек.
Аудан әкімі Бақыт Асановтың бастамасымен аудан қайта құрылған 5 жыл ішінде 3 ауысымды мектептердің қатарын азайту және ыңғайластырылған мектептерді жою мақсатында 17 мектептің жаңа ғимараты салынып пайдалануға берілген. Оның қатарында 1200 орындық, 600 орындық, 300 және 200 орындық мектептер бар.
Биыл да Еркінабад, Азамат, Өркениет және Нұрлыжол елдімекендерінен 200 орындық 4 мектептің құрылысы жүргізілуде. Сонымен қатар, Ел Президенті Қасым-Жомарт Тоқаевтың арнайы тапсырмасымен «Жайлы мектеп» пилоттық ұлттық жобасы шеңберінде ауданымызға жаңадан 5 мектептің құрылысы жоспарланып, 1500 орындық және 600 орындық 2 мектептің құрылыс жұмыстары басталып кетті.
