Бәйдібек ауданы орталығындағы «Зиякүл» мейрамханасында Халықаралық қарттар күні мерекесі аталып өтті. Салтанатты іс-шараға аудан әкімі Ержігіт Шәріпбеков қатысып, аудан ардагерлерін мерекемен құттықтап, құрмет көрсетті.
– Құрметті ауданымыздың ақсақалдары мен ақ жаулықты әжелері»! Сіздерді 1 қазан — Халықаралық қарттар күні мерекесімен шын жүректен құттықтаймын! Сіздер еліміздің қазынасысыздар. Әрбіріңіздің жүріп өткен жолдарыңыз, еліміздің дамуы үшін еткен еңбектеріңіз – ұрпақ үшін үлгі-өнеге. Сіздердің өмірлік тәжірибелеріңіз бен ақыл-кеңестеріңіз, тәлім-тағылымдарыңыздың біз үшін орны бөлек. Себебі, әрқайсыларыңыздың ауданымыздың өсіп-өркендеуіне қосқан үлестеріңіз бен еңбектеріңіз ерен. Талай жасты тәрбиелеп, ізбасарларыңызды өсірдіңіздер. Бүгін, еңбектеріңіздің зейнетін көріп отырсыздар. Осы мерекеде баршаңызға зор денсаулық, ұзақ өмір, отбасыларыңызға амандық пен бақ-береке тілеймін! – деді Ержігіт Шәріпбекұлы.
Шарада «Amanat» партиясының Бәйдібек аудандық филиалының төрағасы Ақбала Құлымбет пен аудандық ардагерлер кеңесінің төрағасы Бағдат Қалаубай ардагерлерді құттықтап, ауданымыздың қоғамдық жұмыстарына белсене қатысып жүрген бірқатар еңбек ардагерлеріне алғыс хаттар тапсырды.
Ауданымыздың елді мекендерінен келген ардагерлері де мерекелік іс-шарада әннен шашу шашып, мәдениет үйі өнерпаздарының арнайы дайындаған концерттік бағдарламасын тамашалады.
