Келес ауданында 1 қазан — Қарттар күніне орай «Қартымыз қазынамыз» атты мерекелік іс-шара өтті. Мерекелік шара аудан орталығында «Нұр Қожа» салтанат сарайында өтіп, Келес ауданының әкімі Жәнібек Ағыбаев, Келес өңірін түлетуде тынымсыз еңбек етіп, ауданның әлеуметтік-экономикалық саласының дамуына сүбелі үлес қосқан еңбек ардагерлері қатысты. Қазыналы қариялар ардақталған жиында аудан әкімі ардагерлерді мерекемен құттықтады.
— Алдыңғы буын аға-апаларымызға, ерен еңбек үлгісін көрсеткен ардагерлерімізге осы бір қайырымдылық пен даналық көрінісі іспетті жарқын мерекелеріңіз құтты болсын дейміз. Бүгін біз қарттарымызға құрмет көрсетіп, құттықтаумен бірге, ардагерлерімізге жан-жақты қолдау мен ыстық ықыласқа толы алғыс сезімін білдіреміз, яғни олар өздеріне деген шынайы қамқорлықты сезінуі қажет. Қазақ халқының ұлттық менталитетінің жарқын белгісі қашанда үлкенге – құрмет, кішіге ізет көрсету десек, бұл игі дәстүр жалғасын таба берсін, — деді аудан басшысы Жәнібек Есенұлы.
Шара барысында аудандық ардагерлер кеңесінің төрағасы Шералы Сәрсенұлы ұрпақтар сабақтастығы мен бүгінгі қоғамдағы ұрпақ тәрбиесіне баса назар аудар отырып, болашақтың иелерін тәрбиелеуде күш біріктіруге шақырды.
Бар жастық жігері мен күш-қайратын елінің ертеңіне арнап, аянбай еңбек еткен қарттарымыздың төл мерекелерін жоғары деңгейде атап өтуде аудандық Жұмыспен қамту және әлеуметтік бағдарламалар бөлімі мен аталған бөлімге қарасты «Қазыналы қария – тең қоғам» әлеуметтік қызметтер көрсету орталығы өз үлестерін қосып, аудандық мәдениет үйінің өнерпаздары мен мереке иелері де әсем әннен шашу шашты.
