Бүгін Ордабасы ауданының орталығы Темірланда Еңбек күніне арналған салтанатты іс-шара өтті.
Тұңғыш Президентіміздің шешімімен мереке ретінде бекітілген күнге орай аудандық Мәдениет үйінде мемлекеттен қаржылай көмек алып, өз кәсібін ашқан кәсіпкерлердің көрмесі ұйымдастырылды.
Ордабасы ауданыныңәкімі Азат Оралбаев аудан прокуроры Абзал Қыдырбай, аудандық мәслихат төрағасы Бақдәулет Жұмабеков , аудандық Полиция бөлімінің басшысы Ғалымжан Қуашбаев көрмені арнайы тамашалап, кәсіп бастаған еңбек адамдарын мерекемен құттықтады.
Мұнан соң мерекеге арнап аудандық Мәдениет үйі өнерпаздарының концерттік бағдарлама ұсынды. Аудан басшысы Азат Әбдіғалиұлы қоғамның әр саласында өнімді жұмыс істеп келе жатқан аудан азаматтарын мерекелік Алғыс хатпен марапаттады.
«Құрметті жерлестер, Сіздерді Еңбек күнімен шын жүректен құттықтаймын! «Еңбек –өмір мәні» десек, бұл мереке адал еңбегімен еліміздің дамуы мен өркендеуіне өлшеусіз үлес қосып жүрген баршаңызға деген құрметтің көрінісі деуге болады. Бүгінде ауданымыздағы 130 мыңға тарта халықтың барлығы дерлік адал еңбегімен қоғамда өз орнын алған азаматтар. Бірлік пен татулық мекенінің жыл өткен сайын дамуы, ауылшаруашылық, кәсіпкерлік саласындағы жетістіктерге жетуі маңдай терін төккен ауданымыздағы еңбек адамдарының арқасы деп айтар едім. Әр салада кәсіби біліктілік пен мамандыққа адалдықтың шынайы үлгісін көрсетіп жүрген Сіздердің ерен еңбектеріңіз қандай құрметке болса да лайық», деді аудан әкімі Еңбек күніне арналған құттықтауында.
