Халықты жұмыспен қамтып, кәсіпкерлік субъектілерінің бәріне бірдей, тең жағдай жасау мақсатында Төлеби ауданы аумағында 2021-2025 жылдарға арналған кәсіпкерлікті дамыту жөніндегі ұлттық жоба жүзеге асуда. Жоба шеңберінде әлеуметтік жұмыс орындары ашылып, алған кәсіби мамандығы бойынша жоғарғы және орта білімді жастарға бастапқы жұмыс тәжірибесін алуға арналған «Жастар практикасы», «Алғашқы жұмыс орны», жұмыссыз азаматтарға арналған «Қоғамдық жұмыстары», «Күміс жас» жұмыспен қамтуды қолдау жөніндегі мемлекеттік шаралары іске асуда.
Бұған қоса, жұмыс орындарын субсидиялау арқылы кәсіпкерлерді қолдау арқылы қайтарымсыз грант және «Бастау-Бизнес» жобасы аясында жеңілдетілген несие берілуде. Нәтижесінде 2023 жылдың басынан бері 45 азамат кәсібін бастауға 400 АЕК есебінде, яғни 1 млн 380 мың теңге қаржы алса, 703 азамат жеңілдетілген несиеге қол жеткізді. 7 азамат шағын несие алып, 925 тұрғын қоғамдық жұмысқа тартылып, 122 адам «Күміс жас» жобасы негізінде жұмысқа орналасты. 271 тұрғынға әлеуметтік жұмыс орны ашылса, тек 55 жас қана «Жастар практикасы» негізінде жолдама алды. Айта кететіні, оқу орнын бітірген жас мамандардың алғашқы жұмыс тәжірибесін жинақтауға арналған жобаның жастарға берер тәлімі өте мол.
«Жастар практикасы» бағдарламасына сәйкес, бұрын жастарға жарты жылға жолдама берілсе, қазір ол бір жыл дейін ұзартылған. Осы бір жылдың ішінде жастар 92 мың теңге жалақы алады. Сонымен бірге «Алғашқы жұмыс орны» деген бағдарлама да бір жарым жылға дейін ұзартылды. Бұл бағдарлама бойынша да жастар 30 АЕК көлемінде айлық алатын болады.
