Ұстаз деген сөз біз үшін қашанда қадірлі, қасиетті саналады. Небір данышпан да, қарапайым еңбек адамы да осы ұстаз алдынан өтеді. Ал, ұстаз болу кез-келген адамның қолынан келе бермейтін іс. Ендеше «Еңбек адамы» айдарының кезекті шығарылымының кейіпкері өзінің еңбек сүйгіштігінің арқасында бір ұжымның мақтанышына айналып отырған Сауран ауданы адами әлеуетті дамыту бөліміне қарасты №25 жалпы орта мектеп директорының бейіндік оқыту бойынша орынбасары, тарих және география пәнінің мұғалімі, кәсіподақ мүшесі — Ахтамов Ахтамхан Нузурұлы.
Ахтамхан Нузурұлы 2005 — 2009 жылдары Халықаралық Қазақ — Түрік университетінің «География» пәні мамандығын, ал 2014 -2016 жылдары Қазақстан халықтар достығы инженерлік-педагогикалық университетінде тарих пәні мамандығы бойынша оқып тәлім алған. Еңбек жолын 2012 жылы №25 жалпы орта мектебінің география пәнінің мұғалімі болып бастаған. Қазіргі таңда осы мектеп директорының бейіндік оқыту бойынша орынбасары қызметін ойдағыдай атқарып келеді.
Ұстаздық еткен жылдарында қаншама шәкіртін білім нәрімен сусындатып, бойларына ізгілік шуағын дарыта білген Ахтамов Ахтамхан бүгінде білім ордасында шәкірттерінің сүйіспеншілігіне, әріптестерінің құрметіне бөленіп, жаңа дәуірдің жаңа үрдісіне сай еңбек етуде. Білгенін өзгелерге үйретуден еш жалыққан емес.
Сондай-ақ осы салада 10 жылдан астам еңбек етіп келген уақыт аралығында кейіпкеріміз көптеген нәтижелі жетістіктерге қол жеткізді. Еңбек жолында 2017 жылы — Қалалық білім бөлімінің жалпы білім беретін пәндер бойынша мұғалімдердің қалалық олимпиадасына қатысып, жүлделі ІІІ орынды иеленгені үшін — Мақтау қағазымен марапатталған болатын. Сонымен қатар, бірнеше рет облыстық, қалалық, аудандық білім басқармаларының, Қазақстандық салалық білім және ғылым қызметкерлері кәсіптік одағының Құрмет грамоталары мен Алғыс хаттарының иегері атанған.
Олай болса, «Түркістан облысы кәсіподақтар орталығы» аумақтық кәсіподақтар бірлестігінің ұжымы атынан өз ісінің білікті маманы еңбеккер бейнесіндегі кейіпкеріміз ұстаз Ахтамхан Нузурұлына зор денсаулық, еңбегіне сәттілік пен шығармашылық табыс тілейміз!
